Baatiin Ramadaanaa baatii hawaasni Musliimaa hundi yaaduufi hawwii guddaan eeguudha. Baatiin kun balbaloonni Ahizaabaa kan itticufamaniifi kan Jennataa bal’atanii ittibanamaniidha. Ramadaanni ji’a araaraafi eebbaa Musliimni soomaafi ibaadaadhaan uumaasaa wajjin walitti dhiyaatu; kan zikiriin ittibaay’atu; gaarummaan cimee ittimul’atuudha.
Baatii Ramadaanaa kana ilaalchisuun Ministirri Muummee Doktar Abiyyi Ahmad bara darbe akkana jedhanii turan: Akka lakkoofsa bara Hijiraa baatiiwwan 12 of keessaa qabuufi marfata ji’a ja’aarratti hundaa’uudhaan diriirfametti baatiin Ramadaanaa ji’a Shabaanitti aanee dhufa. Hamma baatiin qajeelummaa, Ramadaanni dhufutti mu’immiin baatiiwwan qorumsaa 11 nidarba. Hamma Ramadaanni hojii gaariidhaaf cimanii dhama’uutu eegama.
Baatiin Ramadaanaa qormaatawwan lama qaba. Utuu hindhufiin dura qormaatawwan baatiiwwan 11f dheeratutu isa mudata. Erga dhufee boodammoo sooma, eebbaafi garalaafinaa akka hintaane sheexanni qormaata biraa ittifida. Amantaa dhugaan lamaanuu dandamatee jabaatee keessa darba.
Baatii Ramadaanaa kanatti keessumaa yeroo dhihoo as Ministira Muummeerraa eegalee hoggantoonni, namoonni dhuunfaafi dhaabbileen garagaraa sirna Afxiraa (Lulluuqqachiisaa) taasisuun duudhaan tokkummaafi wajjummaa bal’inaan akka mul’atu ta’eera.
Akka pirezidaantiin Mana Marii Waliigalaa Dhimmoota Islaamummaa Itoophiyaa Sheeh Ibraahim Tufaa jedhanitti, erga amantiin Islaamaa biyya kana seenee waggoota kuma tokkoofi 452 yoo ta’es (Ramadaanni 1446 kan jedhamuuf inni Hijiraadha) biyya kanatti akka hinbeekamne ta’ee tureera. Soomni baranaa Musliimas ta’e kan Musliima hinta’iin waliin kabajaa jaalalaafi tokkummaan darbaa jira.
Gochi kunis Ramadaanni baatii tokkummaa, jaalalaa, gamtaa’inaafi, hammattummaa ta’uusaa afaaniin osoo hintaane hojiidhaan kan mul’iseedha. Osoo amantiidhaan adda walhinbaasiin, ministeerotarraa kaasee hanga dakaatti uffata Musliimaa uffatanii Ifxaaraaf hojii keenya jedhanii baatii guutuu dabarsuun ummata Islaamaa biratti gammachuufi galata qofa osoo hintaane seenaa yoomillee hindagatamneefi jaalala biyya kanaa kan cimsu, ummata musliimaas biyyi kun kiyya kan isa jechisiisu, biyya kanaaf lubbuu ofiillee dabarsee akka kennu, naannawasaa kabachiisuufi kabajuu akka danda’u kan taasisuudha.
Duudhaaleen tokkummaa, jaalalaafi waldanda’uu yeroo sooma Ramadaanaatti mul’atan kunniin fuuldurattis cimanii aadaafi barsiifata ta’anii ittifufuu qabu. Waliin nyaachuu, dhuguu, uffachuufi jiraachuun kun caalaatti jabaachuu qaba.
Ayyaana Iid Alfaxir Gaarii!!
BARIISAA SANBATAA Bitootessa 20 Bara 2017
