Shaashamannee: Magaalaan Shaashamannee magaalota Oromiyaa bu’uura pilaanii ammayyaawaan guddina ajaa’ibaa keessa jiran keessaa ishee tokko. Magaalaan Lammiilee biyya alaa kanneen akka Jamaayikaafi Filippiinsi dabalatee Sabaafi Sablammoota 25 ol hammattee abbaa qe’ee Oromoof keessummaa ta’uun gaaffii ummata Godina Arsii Lixaa ture.
Haala misoomaafi nageenya Magaala Shaashamannee ilaalchisee Gaazexaan Bariisaa Kibxata darbe Kantiibaa Ittaanaan Bulchiinsa Magaalattii Obbo Awwal Hasan waliin turtii taasiseera.
Akka isaan jedhanitti, Magaalli Sahaashamannee akka kaleessaa magaala Oromoon keessa oolee galu osoo hintaane magaala Oromoon keessa bulee qabeenya itti horatuufi jireenya magaalaa itti dhandhamatu taatee jirti. Shaashamanneen magaala Oromummaan itti urgaa’uufi aduun daldalaa itti hindhiine gochuuf ijaarsi bu’uuraalee misoomaa qarshii biliyoonaan lakkaa’amuun finiinaa jira.
Dhiibbaa sirnoota darbaniirraa kan ka’e ummatni Oromoo magaalota waliin dugdaafi garaa ta’uun waan horateefi qotatee gurguratee keesaa galaa turuu kaasanii, tarsimoo mootummaan jijjiiramaa ummata fayyadamaa magaalaa taasisuun diriirseen yeroo ammaa ummata jiraataa magaalaa taasisuu bira darbee daldala keessatti hirmaannasaa cimsuun fayyadamummaasaa mirkaneessaa jiraachuu ibsaniiru.
Magaalli kun magaala guddina saffisaa galmeessaa jirtuufi sabaafi sablammoonni 25 ol akksumas lammiileen biyya alaa garaagaraa waldanda’uun jaalalaan keessa jiraatan ta’uu ibsanii, yeroo ammaa magaalaa caalaatti hawwattuufi miidhagduu taasisuuf misoomni kooridarii qarshii biliyoona 2.82 hojjetamaa jiraachuu hubachiisaniiru.
Akka ibsa Obbo Awwalitti, magaala kana keessatti ijaarsi daandii asfaaltii sadiifi marfatni tokko kanneen sadarkaasaanii eeggatan adeemsifamaa jiru. Sochii daandiiwwan keessa keessaa 10 dhagaa koobiliin ijaaruu taasifamaa jira. Seensa magaalattii hanga Mootummaa Naannoo Sidaamaatti daandii dheerinnisaa kiiloo meetira 48 ta’u bitaafi mirgi misooma kooridariin hawwataa taasisuuf qophiin xumuramee jira. Daandii hawwataan Shaashamannee-Alaabaa kan mootummaa federaalaan hojjetamaa jirus tumsa ummatni taasiseen sadarkaa gaariirra jira. Namoota kuma sadiitti dhiyaataniifis carraan hojii uumameera
Hojii misoomaa magaalattii milkeessuu keessatti tumsi ummataa daran olaanaa ta’uu himanii, misooma kooridaariin walqabatee baasii tokko malee dallaafi mana jalaa butachuu bira darbee hirmaannaa gara qarshii miliyoona 113tti tilmaamamu taasisuu yaadachiisaniiru.
Walumaagalatti, Shaashamanneen du’a Artisti Hacaaluu Hundeessaan walqabatee jeequmsa mudateen akka malee mancaatee turte ammaan tana rakkoo nageenyaa keessaa saffisaan ba’uun daandii guddina abdachiisaarra jirti.
Waaqshuum Fiqaaduutiin
BARIISAA SANBATAA Guraandhala 8 Bara 2017
