‘COVID-19’ dinagdeef misooma ispoortii kubbaa miilaa sakaaleera

Finfinnee: Akaakuuwwan ispoortii adda addaa qalbii hawaasa addunyaa  harkisuu fi daawwattoota baay’ee  horachuu keessatti ispoortiin kubbaa miilaa isa duraati. Kallattiinis ta’u al kallattiin ummatni biliyoona 6.2 ta’u jaalala ispoortii kanaa kan qabuudha. Ispoortiin kun yoomiifi eessatti akka jalqabame beekamuu baatus kan dhalate biyya Ingilizitti akka ta’e himama.

Ispoortiin kubbaa miilaa kun biyyoota Awuroppaa keessatti jaalatamuummaan isaa cimaa dhufuurraa  kan ka’e mataasaa danda’ee waldaan akka hundeeffamuuf yaada dhihaateen ALA bara 1920 keessa irratti mari’atamee booda bara 1930 waldaa piroofeeshinaalotaa  ta’uun hundaa’eera.

Waldaan kun biyyoota miseensota   yeroo sanaa 13 jidduutti waancaan kubbaa miilaa pirofeeshinaalota kanneeniin gaggeeffamuu akka jalqabu gochuudhaan Uraaguwaayi waancaa kubbaa miilaa Adunyaa jalqabaa bara 1930 keessumeessuudhaan waancicha hambifatteetti.

Biyyoota yeroo jalqabaaf waancaa kanarratti hirmaatan jiddutti haa gaggeeffamu malee ispoortiichi yeroo gabaabaa keessatti ardii maraarratti beekamtii argachuudhaan biyya keenyas seenuu danda’eera.

Ispoortiin kubbaa miilaa kun Itoophiyaatti beekamtii edda argatee walakkaa jaarraa tokko olii  lakkoofsiseera. Mootummaan Itoophiyaas ispoortichaaf xiyyeeffannaa kennuudhaan federeeshinii kubbaa miilaa Itoophiyaa hundeesuudhaan federeeshinichi kilaboota liigii piriimeerii Itoophiyaa,liigii biyyaalessaa dabalatee kanneen naannoolee gurmeessuudhaan akka bulchu taasiseera.

Haaluma kanaan  dargaggoonni biyyattii kanneen dandeettii qaban kilaboota adda addaa keessatti hirmaachuudhaan carraa qabeessota hojii ta’uu danda’aniiru. Haata’u malee yeroo ammaa sababii ‘COVID-19’n addunyaarratti babal’achaa jiruuf kilaboonni hedduun galiin isaanii hira’achaa dhufuudhaan humna galii isaanii  dadhabsiisaa jira.

Rakkoo gama kanaan mudachaa jiru qisuuf sochii taasifama ajiru ilaalchisuun  Itti Aanaa Bareessaan Federeeshina Kubbaa Miilaafi Ittigaafatamaan Kutaa Teekinikaa  Federeeshinii Kubbaa Miilaa Itoophiyaa Obbo Salamoon Gabrasillaasee tibbana gaazeexaa bariisaaf akka ibsanitti, ‘COVID-19’ addunyaarratti babal’achaa adeemudhaan dinagdee biyyoota hedduu irratti dhiibbaa qaqqabsiiseera.

 Rakkinni kun ammoo damee ispoortiiwwan heddu laamshessuu yoo kaasan Keesumatu daawwataafi deeggartoota  biliyoona hedduu kan qabu ispoortii kubbaa miilaarratti dhiibbaa olaanaa qaqqabsiisuun dinagdee biyyootaa miidheera.

Federeeshinii kubbaa miilaa Itoophiyaa jalatti sadarkaa adda addaatiin kilaboonni kubbaa miilaa dhibbaa ol ta’an gurmaa’uudhaan,dargaggoonni hedduu miindeffamaniiru, carraa hojii argachuun mataasaaniifi maatiisaanii gargaaraa jiru.

 Akkasumas garee biyyaalessaatiif filatamuudhaan biyyattii bakka bu’uun wal morkiiwwan biyyooleessaarratti hirmaachaa jiru. Wayita tapha biyyoolessaa gaggeeffamus, ija leenjistoota kilaboota biyyoota alaa keessa galuudhaan pirofeshinaalota ta’uun biyyi teenya sharafa alaa akka argattuuf shoora olaanaa taphataniiru ammas ittuma jiru.

Haaluma kanaan yeroo ammaa kana kubbaan miilaa madda galii ta’usaatti biyyattii dinagdeen utubaa kan jiru yoo ta’u, dargaggoonni biyyaas damee kanarraa fayyadamtoota ta’uusaanii O bbo Solomon ibsaniiru.

Dargaggonni ispoortii kanarratti hirmaatanis kanuma ummataa ta’usaanitti ummannis  kallattii adda addaatiin ispoorticha deggaraa tureera kan jedhan obbo Solomon  hirmaannaan ummataa ammas itti fufuu akka qabu yaadachiisaniiru.

Rakkina gurmaa’inaatiin kan ka’e kilaboonni kubbaa miilaa biyya keenyaa guutummaa guutuutti harka mootummaa jala waan jiraniif mataasaanii danda’anii galiidhaan of bulchuuf humna hin waan hinqabneef  maxxantoota ta’usaanii ibsaniiru.

Akkuma beekamu kanaan dura maddi galii kilabootaa dirreewwan kubbaa miilaarra galii argamudha.Hata’u male ammaan tana sababii ‘COVID-19’ kanaan kan ka’een wayita kilabonni taphatan deeggartoonni 10-20 qoftti istaadiyomii galuudhaan akka deeggaran ta’usaatti galiin istaadiyomarraa argamu hin jiru.

Akkasumas kanaan dura dhaabbileen adda addaa omisha isaanii beeksisuuf bakka daawwattoonniifi deeggartoonni hedduun argaman istaadiyoomii  magaalaa finfinneefi naannoleetti beeksisuuf jecha ispoonsara gochaa turanis ammaan tana  gargaarsa kana dhabuudhaan maddi kun dhaabachuusaatti kilaboonni hedduun rakkina keesa jiraachuusaaniis ibsaniiru..

Waan kana ta’eef kilaboonni hedduun taphattoota isaaniif miindaa kaffaluu waan hindandeenyeef heddunsaanii yeroo gabaabaa keessatti rakkina faayinaansiin walqabatee  diigamuuf qarqara irra gahuusaanii obbo Solomon beeksisaniiru.

Tashoomaa Qadiidaatiin

Gaazexaa Bariisaa Amajjii 15/2013