“Caaseffamni Sirna Gadaa Oromoo kan mootummaa federaalaa caalaa ammayyaa’aadha”-Abbaa Gadaa Doktar Mulugeetaa Dabbabaa

Finfinnee: Sirni Gadaa Oromoo sirna bulchiinsa hawaas-dinagdee, siyaasaafi amantii ummata Oromoo kan calaqqisiisu yoo ta’u, jaarraawwan hedduuf dhimma itti bahamaa tureera; har’as itti tajaajilamaa jirra.

Haa ta’u malee sirni mootummoota darbanii eenyummaa ummata Oromoorratti dhiibbaa hamaa geessisaa waan tureef, sirni bulchiinsa ammayyaa’aa kun walumaan cunqurfamaa tureera. Booranaafi Gujiin alatti hubannoon ummatni Oromoo sirnicharratti qabu daran akka laafuuf sababa ta’eera.

Caaseffamni Sirna Gadaa Oromoo keessa jiru garuu kan sirni mootummaa federaalaa hordofu caalaa ammayyaa’aa ta’uu yeroowwan addaddaatti hayyootni argannoo qorannoosaanii wabeeffachuun ibsaa turaniiru.

Kanneen keessaa  Pirofesar Asmaroom Laggasaa qorannoo waggoota kudhanii oliif Sirna Gadaa Oromoo Booranaa, Gujiifi Keeniyaarratti taasisaniin mirkaneessaniiru. Har’allee hayyootni Oromoo hedduun kanuma ibsuurratti argamu.

Gaggeessaan hojii Dhaabbata Ofiin of Gargaarsa Oromoo (‘OSHO’) Abbaa Gadaa, Doktar Mulugeetaa Dabbabaa Wiixata darbe Gaazexaa Bariisaaf akka ibsanitti, caaseffamni bulchiinsa Sirna Gadaa Oromoo kan mootummaa federaalaa keessa jiru caalaa ammayyaa’aadha; hundarra misooma hawaas-dinagdee si’eessuuf sirna mijataa ta’eedhas.

Caaseffamni kun kan hoggansaa, kan misoomaa, dinagdee, haajaa alaa, hawaasummaafi humna ittisaa of keessaa waan qabuuf kan bulchiinsi mootummaa ammaa hordofu caalaa hojjechiisuu danda’a jedhan. Kana malees caaseffamni sirnichaa walitti hidhamiinsa sabootaafi sablammootaa kan cimsu ta’uurra darbee walitti bu’iinsa uumamuu malu karaa nagaan furuu keessatti gahee guddaa kan taphatu ta’uu ibsaniiru.

Ummatni fuulasaa gara misoomaafi guddinaatti akka fuulleffatu gochuu keessattis gahee olaanaa qaba jedhanii, lammiileen duudhaalee waliin jireenyaa sirnaan eeganii akka jiraataniifis sirna dirqisiisu ta’uu eeran. Caaseffamni kun ammoo sirna bulchiinsa mootummaa naannoo Oromiyaa keessatti akkuma jiruun hojiirra yoo oole kan ammaa caalaa bu’aa qabeessa kan taasisu ta’uus ibsaniiru.

Bulchiinsi Mootummaa Naannoo Oromiyaas wayita ammaa caaseffama Sirna Gadaa keessa jiru hoggansa olaanaadhaan qorachiisaa jiraachuu himanii, caasaa mootummaa keessatti hojiirra oollaan tokkummaa Oromoo eegsisuu keessatti bu’aa guddaa qabaachusaas eeraniiru.

Caaseffamni Sirna Gadaa keessa jiru amantii waliinis idduma tokkotti waltuquurraa kan hafe, hangas mara dhiibbaa guddaa hingeessisu jedhaniiru. Xiyyeeffannoon caaseffama Gadaa, amantii osoo hintaane guddina hawaas-dinagdee si’eessuu akka ta’es hubatamuu qabaa jedhan.

Takkaalliny Gabayyootiin

Suurri Tsahaayi Nigusee

Gaazexaa Bariisaa Fulbaana 3/2012