“Qabsoon farreen nageenyaarratti taasifamu cimee ittifufa” -Bulchaa Ittaanaa Godina Wallagga Bahaa

Naqamtee: Qabsoon farreen nageenyaarratti taasifamu cimee kan ittifufu ta’uu Bulchaa Ittaanaa Godina Wallagga Bahaa beeksisan.

Obbo Asmaraa Ijaaraa ibsa torban darbe Gaazexaa Bariisaatiif kennaniin akka jedhanitti, farreen nageenyaa jiruufi jireenya hawaasaa yaaddoo keessa galchaa turan deeggarsa ummataa hinqaban.

Farreen nageenyaa kunniin lammii ofiitti deebi’uun gocha saamichaa, hanna, ajjeechaa suukanneessaafi gara jabummaan guutame raawwachaa turuu Obbo Asmaraan beeksisaniiru.

Humnoonni badii kunniin nageenya lammiilee booressuun saamichaafi hanna raawwachuuf yaalii taasisaa turaniin miidhaan qabeenyaafi lubbuu lammiileerra gahe jiraachuu Obbo Asmaraan himanii, gochaa kanarraa akka deebi’aniif tarkaanfiin fudhatamaa jiraachuu ibsaniiru.

Tarkaanfiin humnoota kanneen seecca’uun seeratti dhiyeessuu eegalame jajjabeessaa waan ta’eef ittifufiinsa akka qabaatuuf ummanni deeggarsa taasisaa jira jedhaniiru.

Akka ibsa Obbo Asmaraatti gochi badii kamuu deeggarsa ummata bal’aa kan hinqabneefi kabajamuu olaantummaa seeraa kan faallessu waan ta’eef humnoonni kunneen hawaasa godinichaatiin balaaleffatamuu ibsaniiru.

Shira humnoonni harcaatuun xaxaa turaniin lammiileen bahanii galuu hanga dadhabanitti gahuu eeranii, sosochii nageenya waaraa fiduuf amma eegalameen jijjiiramni mul’achaa jiru jajjabeessaa ta’uullee yaadachiisaniiru.

Nageenya waaraa lammiilee deebisuuf tarkaanfii mootummaan fudhachaa jiru cimee ittifufaa jiraachuu kan himan bulchaa ittaanaan kun, qaamni nageenya ummataa booressuun faayidaa mataasaaf kaatu kamuu of qusachuu qaba jedhaniiru.

Kaayyoon farreen nageenyaa qabatanii deeman takkaan hannaafi saamicha gaggeessuu taakkaanimmoo karaa qaxxaamuraan aangoo qabachuu kan kaayyeffateedha kan jedhan Obbo Asmaraan, biyya dirreen dimokraasii babal’achaa jiru keessatti yaaliin gama kanaan taasifamu hiika kan hinqabne ta’uu dubbataniiru.

Humnoota karaa seeraan alaa dheebuu aangoof qaban bahachuuf karaa seeraan alaa socho’an adamsamaa akkasumas to’atamaa  seeratti dhiyaachaa jiraachuu ibsaniiru.

Hordoffii walirraa hincinne taasifameen qaamolee nageenya booressaa turan hedduun kan to’atamaa jiran ta’uus eeranii, kanneen hafanis harka kennachuun of haaromsuuf deebi’aa akka jiranillee beeksisaniiru. Tarkaanfiin humnoota kana dhabamsiisuuf fudhatamu bu’aa qabeessa akka ta’uufi nageenyi ummataa akka mirkanaa’uuf lammiileen mootummaa waliin hiriiruun tumsa barbaachisaa taasisaa turan cimsuu akka qaban gaafataniiru.

Waasihun Takileetiin

Gaazexaa Bariisaa Adoolessa 27/2011