Mootummaan pirojektota ijaarsisaanii harkifate xumursiisuurratti xiyyeeffatee hojjechaa jira

Oromiyaatti pirojektonni misoomaa adda addaa jalqabamanii utuu hinxumuramin hafuufi duubatti harkifachuun hawaasa biratti komii guddaa uumaa tureera; uumaas jira. Bara bajataa kana mootummaan naannichaa pirojektota misoomaa jalqabaman xumursiisee tajaajilaaf akka oolan taasisuurratti xiyyeeffatee hoj echaa jira.

Torban kana keessa pirojektonni misoomaa kanneen akka manneen barnootaa, daandii, bishaan dhugaatii qulqulluu, buufataalee fayyaa, sheediiwwan Godina Addaa Oromiyaa Naannawaa Finfinnee Magaalaa Galaan, Magaalaa Bishooftuu, aanaanlee adda addaa Godina Arsiifi Arsii Lixaatti argaman hedduun xumuramanii eebbifamaniiru.

Pirezidaantii Ittaantuufi Hoggantuun Kilaastara Hawaasummaa Oromiyaa, Aadde Xayibaa hasan sirna eebba pirojektota kunneeniirratti argamuun akka jedhanitti, mootummaan naannichaa yeroo kamuu caalaa hojiilee misoomaa saffisiisuu, ijaarsa pirojektota misoomaa kanaan dura addaan citaniifi duubatti harkifatan xumursiisuun tajaajilaaf akka oolan taasisuurratti xiyyeeffatee hojjechaa jira. Hojiilee misoomaa mootummaan keessumaa gama hawaas dinagdeetiin raawwataa jiru keessaa dameen barnootaa adda durummaan eerama.

Misoomni misoomaa olii barnoota waan ta’eef hojiileen manneen barnootaa bakka hundatti babal’isuufi qulqullina barnootaa mirkaneessuu cimanii kan itti fufan ta’uu himaniiru.

Mootummaan naannichaa manneen barnootaa ijaaraman meeshaalee deggersa barnootaatiin guutuufi teknolojiidhaan kan utubu ta’uu kan himan Aadde Xayibaan, kunis barattoota sadarkaa biyyaa, ardiifi addunyaatti dorgomoo ta’an baay’inaan horachuuf kan gargaaru ta’uu eeru.

Manneen barootaa ijaaramanii xumuramuun eebbifaman madda barattoota ciccimoofi hayyootaa akka ta’aniif hawaasni, abbootiin qabeenyaafi qooda fudhattoonni tumsa barbaachisu akka taasisaniif waamicha dhiyeessaniiru.

Hojiileen misoomaa hundi mootummaadhaan jalqabamanii xumuramuu waan hindandeenyeef hawaasni hirmaannaa sadarkaa manneen barnootaa fooyyessuu, tajaajiloota humna hawaasaatiin guutamuu qabaniifi manneen barnootaa ijaaraman eeguufi kunuunsuurratti dammaqinaan akka hirmaatuuf gaafataniiru.

Barsiisonnis maddaafi qartuu beektotaa waan ta’aniif dirqama ogummaasaanii sirriitti bahachuu akka qaban kan yaadachiisan Aadde Xayibaan, barattoonni barumsaafi naamusa gahaa akka horatan, manneen barnootaa keessatti dimokiraasii akka shaakalan taasisuuf daran isaanirraa eegamu bahachuu akka qaban hubachiisaniiru.

Dabtaraafi qalama qabatanii mana barumsaa dhaqanii galuu qofti barachuu jechuu miti kan jedhan Aadde Xayibaan, barachuu jechuun guyyaa guyyaan of fooyyessuu, dubbisuu, hawaasaaf jiraachuu shaakaluufi mul’ata qabaachuudha. Kanaafuu barattoonni barumsa isaanii sirriitti hordofuufi qo’achuu akka qabaniif dhaamsa dabarsaniiru.

Manneen barnootaa bakka jeequmsaa qaroominaa akka ta’aniif kaayyoofi ajandaan barattootaa barumsaafi barumsa qofa ta’uu qaba kan jedhan Adde Xayibaan, mootummaan naannichaas misooma, nageenyaafi tasgabbii waaraa uumuu irratti xiyyeeffatee hojjechaa jiraachuu himaniiru. Godina Arsii, Aanaa Digaluufi Xiijjoo barsiisaa mana barumsaa Xiyyoo Mahaamad Abdallaa akka jedhanitti, manneen barnootaa ijaaramuun darannama gammachiisa.

Manneen barnootaa qofa ijaaranii wantoonni barsiisotaaf barbaachisanis yoo hinguutamne ta’e garuu rakkoo ta’a. Aaanichi lafa bal’aa utuu qabuu barsiisonni aanichaa hanga ammaatti lafa mana jireenyaa waan hin arganneef rakkoon kun yeroo gabaabaa keessatti deebi’uufii akka qabu gaafataniiru.

Barataa Mana Barumsaa Qophaa’inaa Saaguree kan ta’e barataa Geetahuun Taammiruu akka jedhutti, barana qormaata biyyaalessaa kutaa 12fatti qabxii olaanaa galmeessisuuf yeroosaa utuu hinqisaasessin sagantaa baafatee sirriitti qayyabachaa jira. Barattoonni biroonis fakkeenyummaasaa akka hordofan dhaama.

Bariisaa Guraandhala 29/2011

Natsaannat Taaddasaatiin