Addis Ababa:– Gobboomu amaalammete bare gobbate qarrira hegeraamo mala haadhe daggino dhaggete gafa ikkasenni baalunku harinshote aana assanno beeqqo kaajjisha hasiissannota Itophiyu Amaalammete Komishiine Komishiinerchi Ambaasaadder Muhammed Diriiri qummeessino.
Komishiine Sidaamu qoqqowira hasaawu hedo gamba assate qixxeessitino bare bero Hawaasi quchumira hananfoonni.
Tenne yannara komishiinete komishiinerchi Ambaasaadder Muhammed Diriiri; “gobboomu amaalamme bare sa’ankera hasiissannokki dhaggete gafaati” yiino.
Ikkinohura, hedote badooshshi korkaatinni kalaqantino sumimmete hoonginna gaancubba iillishshinota baca qarrubba amaalamatenni tira hasiissannota coyirino.
“Sumuu yaa hoongete korkaatinni kalaqamu eltubbankenna jironke hasi’nanni bikkinni horoonsineemmokki gede guficho ikkinonke” yiinohu Komishiinerchu; baalante Itophiyu daga hedo ikkitinoti amaalammete harinsho gummaame ikkitanno gede baalanti hajo la’anno bissa qeechansa fula hasiissanno yiino.
“Amaalammete bare gafi mittu woleho hasaawannota ikkitukkinni baalanti Itophiyu daga ayirrisamatenninna taalleenyunni gobbansa daafira maltannote” yiinohu qole komishiinete komishiinerchi dokiter Ambaye Ogatoho.
“Sannate hasaawate poletikinni fulle amaalammeemmonna macciishshammeemmo kaayyo horoonsira hasiissanno” yiinohu komishiinerchu; “mittimmanke agarsiinse gutu huwanyo amande kaajjado dagoomanna gobba ijaarreemmo gafaati” yiino.
Barete aana qoqqowunni 45 woraddanni riqiwantino 1 kumi 800 dagoomu bissa, poletiku paartuwanna babbaxxitino uurrinshuwa riqiwamaano, mootimmatenna hallanyu uurrinshuwa riqiwamaanonna xiiwo kalaqqanno hallanyooti beeqqitanni afantanno.
Tini amaalammete bare aana beeqqitanno bissa dagatewiinni uyinoonninsa riqiwo halaalaanchimmatenni fulate barete aana sheemaate e’ino.
Amaalammete hedo gamba assate bare qoqqowoho beronni hanaffe lamala barrubbara harinsannita xawinsoonni.
Abbebech Maatewoos
Bakkalcho Woxawaajje 23, 2016 M.D
