Daga kayissannota farcote xa’mo dawarate fultinoti farcote reekko mixo guma leellishshinota IFDR dagate riqiwamaano amaale mini seerunna farcote hajubba uurrinshu komite egensiissu.
“Dagoomu hanqafo farcote owaante woyyaawino soqqamaanchimaranna kasseenyira” yaanno uminni 6ki farcote ministerenna Sidaamu qoqqowi farcote biiro gutu gambooshshenna amaalammete bare Hawaasi quchumira harinsoonni.
Amaalete mini seerunna farcote hajubba uurrinshu komite gambisaancho dukko Itsegennet Mengistuti barete aana yitino garinni; daga farcote aana kayissannota farcote xa’mubba qolate dandiissannota farcote reekko mixo amande loosu aana hosiinsoonni.
Mixo kaima assatenni qoqqowubbanna quchumu gashshootta uminsa noo akatinni ka’e gumultanni noota dagate riqiwamaano amaale mini assanno harunsonna irkonni buuxate dandiinoonnita coyidhino.
Konninnino jawa guma afi’noonnita qummeessatenni, dagoomu farco bowirsa, uurrinshuwate mereero qinaabbinoti loosu hayyo bowirtanno gedenna teknolooje horonsi’nanni hayyo woyyaawino deerrinni lophitanno gede dandiisa assinoommo keenonni buuxate dandiinoommo yitinno.
Farcote amanyoote teknoloojetenni irkisaminoha assatenni mussinnanna baincho assoote ittisate jawa kaayyo fanannoha ikkasi qummeessino.
Sidaamu qoqqowi pirezidaantichi kalaa Desta Ledamohu isi widoonni; farcote bissa dagate kasseenya abbate ammanamatenna qinaambetenni owaatatenni agarantannonsa yawo fula noonsa yiino.
Dagate kasseenya abbate farco jawiidi doogonna hasiissanno hajo ikkasenni owaante yannaasincho assatenni ammanamatenna qinaambetenni owaata hasiissannota coyi’rino.
Wo’munku raginna halaalaancho farco buuxisate widoonni deerru deerrunku afantannori farcote bissa qinaabbe loosa noonsa yinohu kayinni farcote minister dieeti kalaa Tesfaye Dhaabaho.
Farcote reekko mixo garinni Federaaletenna qoqqowu farcote bissa qinaabbe loosate dandaansanni batinye gumma dagginota qummeessino.
Federaaletenna qoqqowu farcote uurrinshuwanni mitte mixo mitte rippoorte yitanno harinshonni looso hananfoonnita qummeesse; gobboomu reekko baalante qoqqowubbara gumultanni noota qummeessino.
Lame barra keeshshitino ba’re aana baalante qoqqowubbanna lamente quchumu gashshootta farcote biiro sooreeyye beeqqitanni afantanno.
Amaalammete bare aana qoqqowubba diru jeefishshansa shiqishsheenna hasaawa assinannita xawinsoonni.
Gaazeexu Odeessaanchinni
Bakkalcho Woxawaajje 23, 2016 M.D
