Addis Ababa:- Bayriidi Itophiyu haaroo`mate kofatto Afriku baalira naaxxille, jawaantenna soorrama dandiineemmo yitanno gede baqqi assitanno wolqaati yee xaphoomu ministirchi Abiy Ahimed (D/r) xawisino. Kofattote 3kinna 4ki terbayinubba looso hanaffino.
Xaphoomu ministirchi Abiy Ahimed (D/r) kofattote loosi harinshonna xa noo uurrinsha daafira uyino xawishshinni xawisino garinni; xaa yannara shoole terbayine wolqa burqissanni nooha ikkanna; shoolu agani gedensaanni ledote sase terbayinubba looso hanaffanno. Tini Afrikunni jawiidi kofatto Afriku baalira naaxxille, jawaantenn soorramma dandiineemmo yitanno gede baqqi assitanno wolqaati.
Daanno sadaasu agani geeshsha bayiriidi Itophiyu haaroo`mate kofatto 70 biliyoone meetir kiyube ali waa amada dandiitannotano buuxisino.
Sadaasu aganira kofattote siviilete loosi wo`munni wo`ma jeefisamanno yiinohu xaphoomu ministirchi; elekitiro mekaaniikete loosi aantanno lee aganna giddo gumulamannotanna xaphooma kofattote loosi qole daanno diro jeefisamate gafa aana iillannota huwachishino.
Kofatto jeefinsoommo yaa dandiinanni; konni gedensaanni woxunna tekiniikete bidhatto dinonke yiinohu Abiy (D/r); gufissankera heddino mannooti shitinonkeha, manna fugge gawajjo iillishshinoha ikkara dandaanno kayinni diuurrissinonke looso gundoommo yiino.
Kofatto ontu dirira albaanni mayi waano diamaddino, xa leellannorino hatte yannara dino yiinohu xaphoomu ministirchi; techo haaroo`mate kofatto badhillitte 205 km ali waa amaddinoha ikkanna; wororritte linxese 133 meetire iillitino yiino.
Kofatto coyi`ratenni ale ikkasenni batinyu la`e, kisse buuxxa hoogguro mageeshshi geeshsha jawa looso ikkinoro huwata dandiitannokkita xawise; bayiriidi Itophiyu haaroo`mate kofatto hedonna woxu hattono yanna calla di-ijaartino; mundeetennino ijaarroonniho yee coyi`rino.
Sa`u onte dirrara Itophiyu babbaxxitino qarrubbanni amadante noo yannara 15 kume meddi yitanno babbaxxitino gaamubba kofattote hajonni bobbakkino yiinohu Abiy (D/r); siminto laashshatenni hanafe hodhite base iillitanno geeshsha babbaxxino su`mi noonsari hirantino mannooti loosu xa noo deerra iillannokki gedenna jeefisamannokki gede baca yanna woxenna heeshsho kakkaltino yiino.
Sa`u sase dirrara siminto Derbunni kayise kofattote geeshsha iillishate gargarooshshu doogo gatamarsanni, fanje xinqanni, olamanna kofatto loosantinota coyi`re; kofattote baca kakkalamme, madi`ne, hindiiddi`nenna daafurreeti loonsoommohu yee xawisino.
Kofattote aana baantoommo waaga batinye Itophiyu daga qara coye, istiraateejiikete hedo garunni huwattinoha ikkeemmero hakko deerrinni waaga dibaantanni yee coyi`rino.
Gobbate gede jironke gamba assine, huucci`ne, qansootu noonsare fushshite kofatto loossinota xawise; wolootu qole noonsa jiro, yanna fushshite kalqoomu xiiwo kalaqate, gobbate giddo qodhisiisate gaante loossannori nootano huwachishino.
Tenne giddoonniiti techo kofatto maala`lissanno doogonni waa ammaddinota la`noommohu yiinohu xaphoomu ministirchi; Itophiyu daga albinni baxxitino doogonni macciishshama, agarama, gutu illachira mittimma uurra, noonke wolqanni, dhukunna woxunni baala halama hasiissannono yiino.
Qamadeno, haanju harumino, koriiderete latishshinna kofatto loosiweelo seekkara dandiitannokkitanna daafursanno coye ikkinota huwatatenni halama lowontanni hasiissannota coyi`re; kofattonna haanju harumi mootimmate ledo xaadooshshu dinosi; Itophiyunna Itophiyu daga ledo, ilamatenni gobbate tii“a agarsiisate ledo amadisiisaminoha ikkasi huwachishino.
Buximatenni qacifattinonkeri, e`inoonni qarri giddonni difultinanni, jireenyu foole dila`inanni, lata didandiitinanni yaansa xawisatenni; disa`anno`ne, ki`nera fajjinoonnihanna hasiisanno`neha dikkino yitino hallanyootiranna gaamote daganna gobba murcidhuro maa abbitara dandiitannoro kofattonna haanju harumi lawishshaho yee xawisino.
Itophiyu lophite, soorrante, jiroo`mite roduuwinke hudidhanno gede fajjitanno laooshshi heerinkero jireenyu di-einonke yaatenni xawise; jireenyu woxu aleenni ikke heda ikkanna; hedo woxe gamba assine sagale ita ikkikkinni batinyu heeshsho soorra ikkinota coyi`rino.
Kofatto Afriku baalira naaxxille, jawaante soorrama dandiineemmo yitanno gede baqqi assitanno wolqa ikkase xawise; kofatto Sudaanenna Gibitse lowo geeshsha irkisa noonsa kofatto ikkitinotano buuxisino.
Terbayinetenni sa“anno way ledotenni kofatto foo`litanno assinanni furchubbanni mittu xiqqeessinni 2 kume 800 meetir kiyuube waa layyote gobbuwara finca hananfoonnita xawise; way gutu jironke ikkasinni gobbatenna dagate gede hasiisannonke bikka horoonsi`ne hasiisannonsa bikka qole roduuwinkera beehaate yee coyi`rino.
Abbebech Maatewoos
Bakkalcho Woxawaajje 23, 2016 M.D
