Gobboomu deerrinni Woxawaajje 17,2016 M.D mitte Arrishshonni gumullanni haanju harumi mixo qixxaawo gundoonnita Sidaamu qoqqowi irshunna kalaqamu jiro latishshi biiro egensiissu.
Tayxe gobboomu deerrinni mitte Arrishshonni 600 Miliyone chiginyuwa kaasatenni harumanke worro yaatenni xaphoomu ministirchi dokter Abiy Ahimedihu sokka sayisino.
Mitto ikkinummoro konni aleenni dandiineemmo. Mittu ayyaaninni wo’munku Itophiyira harumanke worro yaanni woshshatto assino.
Konninnino jajjabbu 20 ale, qacale kayinni 10 ale chiginyuwa kaasatenni gobbate noonke baxille, ilamate noonke aamansha taalo basera xawinso yinoti qaangannite.
Xaphoomu ministirchi haanja haruma worro yitanno woshshatto kaima assatenni Sidaamu qoqqowi qeechasi fulate qixxaawo assinota irshunna kalaqamu jiro latishshi biiro egensiissino.
Biirote sooreessi kalaa Memmiru Mokehu uyino xawishshinni; qoqqowoho mitte Arrishsho chiginyete kaashsho gumullanni 209 base bandoonni.
Barraho kaansannita dubbunna gummate laalo chiginyuwa lendanna woleno miinju horo uyitanno chiginye qixxeessinoonnita xawisino. Chiginyete kaashsho gumullanni base chiginyuwa qorophotenni hodhinsoonnitano kalaa Memmiru huwachishino.
Kaashshu amanyooti aana loosidhenna ce’e galtino daga lendanna 2 Miliyoone ikkitannori dagoomu bissa beeqqaano ikkitannota kulloonni. Konnirano deerra deerranko bobbakkinori gibrinnu ogeeyye hasiissanno harunsonna irko assitannota kalaa Memmiru coyi’rino.
Tayxe haanju harumi mixo aana baalanti dagoomu bissa annimmatenni beeqqitanno gede woshshatto assino. Kaasa calla ikkikkinni chiginyuwa ka’anno gede amadooshshe assate aanano illacha tunganni gede sokkasi sayisino.
Qiddist Gezzaheny
Bakkalcho Woxawaajje 16, 2016 M.D
