Wodiidi Sidaami zoone dagoomu hajubba biddishshi xaphooma shoole qara qara hajubba aana illachishe loosannoha ikkanna; kurino fayyimma, rosu, budu turizimenna ispoortete loossanna meentu wedellunna dagoomu hajo loosooti. Biddishshu mittu mittunku handaarinni daga horaameeyye assitanno loossa gumulanni afamanno. Konni mereerinni rosu umihonna albisaho
Wodiidi Sidaami zoone Zoonetenni tantanantu kawa dagoomittete hajubba biddishshi aleenni xawinsi qara qara hajubba aana illachishe loosanni keeshshinoha ikkanna; konninnino mittu mittunku handaarinni leeltanno foonqe ittisatenna dagooma horonsi’raano assitanno loossa gumulanni keeshshinota biddishshu sooreette dukko Hayyaalnesh Hanqamoti Itophiyu pireesete uurrinsha ledo assitino hasaawinni coyidhino.
Sooreette xawishshisenni; rosu ledo amadaminohunni, zoonete giddo rosu hiiqqamme noota keennoonni. Kunino rosaano mereeroho marte 8 kifile qoqqowu fonqolonna 12 kifile gobboomu foqolo adhite sa’anno rosaano kiiro woffi yitinota ikkasenni, tenne hiiqqamme sissate balaxote rosi aana illachinshe loonsanni sa’noonni.
Qaaqquulleho kaimu balaxote roso ikkinohura rosaanote maatenna loosaasine assitinno kaa’lonni deerrasi agadhinoha balaxote rosi mine minne shiqinshanni hee’noonnita coyidhannoti dukko Hayyaalneshi; xaa geeshsha assinoonni millimmonni 15 rosi minna maassiinse shiqinshoonni. Xaphooma 100 balaxote mine minate hende loonsanni hee’noonnita xawissinoti sooreette; 47 rosi mini minamanni noota buuxissino.
xaa geeshsha kaimu aana kaajjinshe loonsanni hee’noonni yitinnoti biddishshu sooreette; kaimunni aanne mereeroho 6 na 8 kifile qoqqowu fonqolira hattono 12 kifile gobboomu fonqolira rosaano ikkadda ikkite sa’anno gede qoqqowunna zoonete kaa’lonni rosaanote irkishshu looso uyinanni sa’noonni. Rosu ogeeyyenna irkisaano ‘Rosu gaado’ yaannohunni zoonete afantanno woradda baalanta fincante fonqolamaano rosaanora guwurshu roso uyitanni sa’inota ledde xawissino.
Dukko Hayyaalneshi xawishshi garinni, xaa yannara sasu agani gaado jeefinse aanino rosu diri millimmo hananfoonniha ikkanna; millimmotenni ogeeyye mitto mittonka rosi mine iillite harunsitanno.
Maxaaffate tuqishshi widoonni, maxaaffa mittu mittunku rosaanchi afi’ranno gede dandiisate loonsanni sa’noonni yitinnoti sooreette; konninnino sa’u yannara maxaaffate anje kalaqantinokkita hasaabbino. Tayxe diro baxxinohunni maxaaffa tuqisa calla ikkikkinni, amadooshshu aanano illachinshe harunsinanni hee’noonnitaati dukko Hayyaalneshi uurrinshanke ledo assitino hasaawinni buuxissinohu.
Konnira yitanno dukko hayyaalneshi; “konnira Rosu hiiqqamme sissate balaxote rosi aana illachinshe loosa hasiissanno” yaatenni wodiidi Sidaami Zoone deerrinni dagitte hajubba handaarra mereerinni rosoho illacha tungoonnita tawissino
Qiddist Gezzaheny
Bakkalcho Woxawaajje 16, 2016 M.D
