Tittirote Odoo
Rosu isilanchimma buuxisiisate, rosaanote fonqolu guma woyyeessate hattono ikkaddanna heewisama dandiitanno ilama kalaqate gobboomu deerrinni balaxote rosira jawa illacha tungoonni.
Quchummate ikko baadiyyete qooxeessubbarano xaa yannara balaxote rosi minna halashshinanni hee’noonni. Ijaarroonni balaxote rosi minnarano daaimu anjensanni afi’ra hasiissannonsa borreessate, nabbawatenna shallagate dandoo afidhanni lophitanno gede kaayyo kalaqantino.
Dukko Adaanech Gabbiso yaamantanno. Aliyye Sidaami zoone Shabbadiini woradira Bonoyya Miridde ollii teessaanchooti. Konni albaanni insa qooxeessira balaxote rosi mini dinoonkanni. Xaa yannara kayinni qaensara deerrasi agarinoha balaxote rosi mine ijaarreenna qaaqquullensa hosiisidhanno maate mereerinni mittete.
Ise yaatto garuinni, konni albaanni qooxeessu manni qaaqquullensa hosiisidhannowi hoogasinni kainohunni xeertowa massine rosu mine eessineenna hossanno. Hattenne yannara qaaqquullu rosu minira hadhannonna higganno woyte xexxerrisunna kaameelu dano iillitannonsa yinanni bidhanteemmo daafira rosu minira disonkeemmonsankanni.Konni kaiminni, umonsa dandiite busha dancha baddu gedensaanni rosu minira eessinanninsa yaannohunni agarsiinsanna dirinsa sa’anno yitanno. Xaa yannara kayinni nafaranke balaxote rosi mine ijaarreennanke qaaqquullenke hosiisi’neemmowa afi’noommo. Tini dagankera jawa kaayyooti yaatenni naqqassanno.
Tenne kaayyo horoonsidhanno gede wolootta maaterano kullanna oosonsa konniicho hosiisi’ra dandiitino. Qaaqquullinkeno dirinsa iilli yannanni kayse balaxote rosi deerrinni afi’ra hasiissannonsa ogimma afidhanni noo daafira buqqeensano fa’nitanna hagiirraammano ikka dandiitino yitanno.
Qoqqowoho rosu isilanchimma buuxisiisate balaxote rosira illacha tungoonnita kulannohu kayinni Sidaamu qoqqowi layinki pirezidaantichinna Rosu Biiro sooreessi kalaa Beyyene Baraasiho.
Qoqqowoho 2017 rosu dirinni 1.3 miliyoone ale rosaano haa’ne rosiisate balaxote qixxaawo assinanni hee’noonnita Qoqqowu Rosu Biiro egensiissino.
Mootimmate rosi minna Woxawaajje 20/2016M.D hanaffe aananno rosu dirira rosaano borreessitanno.
Biiro 2017 rosu dirira umi diriminni, mereerimunna layinki dirimi rosu deerrinni 1.3 miliyoone ale rosaano haa’ne rosiisate balaxote qixxaawo assitanni afantannota kalaa Beyyene Baraasihu xawisino.
Sooreessu xawishshi garinni; rosaano borreessate loosi qoqqowoho Hawaasi quchumiranna baalante zoonnara afantanno rosi minnara ikkanna; rosu minna rosanna rosiisate injiitinore hattono rosu loossara hasiisannore wonshate looso loonsanni hee’noonni.
Haammata hallanyu rosi minna rosaano borreessate loosono harisidhanni afantannota kaysinohu kalaa Beyyene; mootimmate rosi minna kayinni Woxawaajje 20/2016M.D borreessa hanaffannota qummeessino.
Rosu isilanchimma buuxisiisate roorenkanni balaxote rosira illacha tungoonnita kaysannohu Sooreessu; dirinsa iillinonsa qaaqquulli baalante qooxeessubbara daaimu hoshsho kaayyo afidhanno gede balaxote rosi minna halashshinanni hee’noonnita qummeessanno.
Gumulamihu 2016 rosu dirinni rosaano haa’rate ledo amadisiisaminohunni yannatenni borreessama hoogate qarrubba xaaddinota kule; aananno rosu dirinni labbino mommodda xaaddannokki gede maate oosonsa yannatenni borreessiissanno gede hala’lado hasaawa assinoonni. Ledoteno, xaaddara dandiitanno mitiimmubba rahotenni tira dandiinanni garinni mixi’ne loonsanni hee’noonni yiino.
Maxaaffate shiqqo ledo amadisiisaminohunni layinki dirimi rosaanora danchu garinni shiqinshanni hee’noonnitano kulino. 2017 rosu dirinni maxaaffate tuqishshi mittu rosaanchira mitto maxaafa iillinshannitano hattonni.
Sai rosu dirinni qoqqowoho balaxote rosinni hanafe 8ki kifile geeshsha maxaaffa attamisiinsoonni. Aananno 2017 rosu dirira maxaaffate anje kalaqantannokki gede xaa yannara attamisiinsanni hee’noonnitano egensiisino.
Sai rosu dirinni Afuu, shallagotenna sayinsete rosu daninni rosiisaanote anje xaaddinota kulinohu Biirote Sooreessi; qarra tirate rosiisaano soorrotenni hattono haaro qaxaratenni wonshate loonsanni hee’noonnita xawisanno.
Rosiisaanote anje qarra sufino garinni tirate Hawaasi Rosiisaanote kolleejje rosiisaano qajeelsitanni afantanno.
Rosu minna 2017 rosu dirira rosanna rosiisate loosira ijeessinanni hee’noonniha ikkanna; hajo la’annonsa bissano agarranninsa qeecha fultanno gede amadisiise sokkasi sayisino. Konni garinni rosu hiiqqamme sissate daaimootu aana loosa doorshu nookki hajooti yiinohu sooreessu;balaxote rosi bilchaatinoha ikka rosu isilanchimma kaajjishshe hiiqqamme sissitanno yiino. Konnirano baalunku halama hasiissannotano guwursino.
Amsaalu Felleqe
Bakkalcho Woxawaajje 16, 2016 M.D
