Addis Ababa:- Gobbankera Shunkuruuta ikkikkinni Lukkuwa inteemmo widira reekkama hasiissannonke yaanni Xaphoomu ministirchi Abiy Ahimed (Dr) coyi’ri.
Xaphoomu ministirchi Abiy (Dr) tenne yiinohu oyimnarra Sidaamu qoqqowira maatete jireenyi loossa towaanyo assi yannaraati.
Maatete jireenyi yaanno kakkayishsha hananfummonkunni lame dirra ikkino yiinohu Xaphoomu ministirchi; konni kakkayishshihu qaru illachi Itophiyu giddo laashshinoommo Qamade inteemmo qaamattora ikkitanno pirootiine laashshineemmo dhuka kalanqeemmo gedeeti yiino.
Pirootiine yinanni woyte Quuphu, Maalu, Lukkuwu, Ado,malawono lendanniha ikkanna; Qamade daabbo ganniro kuri ledo qaammanni intiro sagalete wowe buuxisiisate noonke ajuuja gummaame ikkitanno yiino.
Xaphoomu ministirchi xawishshi garinni; maatete jireenyinni; baxxinohunni, Lukkuwu latishshi xa hendeemmo garinni shota looso dikkinonkanni. Konne looso hananfi yannara Itophiyu diru giddo 26 miliyoone caacurre laashshitannonka. Daganke kiiro 100 miliyoone aleeti. 26 miliyoone caacurre laashshineemmoha ikkiro mittu qansichira dirunni mittu Lukkichino diillannosi.
“Itophiyaho konni albaani Lukkuwa inteemmo yinummorono Lukkicho ikkikkinni shunkuruuta intanni keeshshinoommo. Shunkuruutu giddo shiima Lukkicho worre ganfe Lukkicho intoommo yineemmo ikkinnina inteemmohu shunkuruutahonkanni. Shunkuruuta ikkikkinni Lukkuwa inteemmo widira reekkama hasiissannonke” yiino.
Zaytenna shunkuruuta batinsikkinni Lukkuwa durinshe daabbote ledo ita dandiineemmo gedeeti qara hasattonke yiinohu Xaphoomu ministichi; tayxe dirinni 80 miliyoone Lukkuwa laashshineemmoha ikkirono; xaano dirunni mitto Lukkicho mittichu qansochira iillisha didandiinoommo yaanni coyi’rino.
Aananno dirinni gobboomu deerrinni 150 miliyoone Lukkuwa laashshate mixo amandoonnitano qummeessino.
Lukkuwu latishshi loosi jawa qoropho hasiisannoha ikkasi kaysinohu Xaphomu ministirchi; konnira, fayyimmansa garunni agaratenninna hasiissanonsa sagale shiqishatenni laalchimma lossate loosa agarrannita huwachishino.
Lukkuwu latishsha gummaamo assatenni Itophiyunni sa’ne wolootta Afriku gobbuwarano hala’ladunni iillishate mixo amandoonnitano hattonni.
Xaphoomu ministirchinna balaxaancho mootitte Zinnaashi Taayyaachew hattono qoqqowu pirezidaantichi Desta Ledamonna woloottuno Federaalete, qoqqowunna zoonnate loosu massagaano Taaboori Ilaalira haanju harumi chigginye kaassinoha ikkanna,xaphoomu ministirichi tayxe lamu diri albaanni Allaamuru ilaali aana kaasino waaddicho iillitino deerra towaate tayixe harumasino worino.
Barrahono, “Assinoonninke iibbadu koyishshira Sidaamu qoqqowo addintanni galanteemmo. Techo maatete jireenyi noo gummaamimma Hawaasa keenne aanino gobboomu Haanju harumi kaashshi barrinni balanxe Malaatenke worroommo” yaatenni SIdaamu budu geerri qeexaalunni assinosi iibbadu koyishshira galata shiqishino.
Amsaalu Felleqe
Bakkalcho Woxawaajje 16, 2016 M.D
