Hawaasa:- Qoqqowoho 50 ale laashshaano Industirra babbaxxitino handaarranni gobbaydinni eessinanni laalcho riqiwate loossanni afantannota Sidaamu Qoqqowi Industirete Latishshi Biiro egensiissu.
Biirote sooreessi kalaa Gosaye Godaana qoqqowoho handaaru loossa towaatte la’ino odeessaanora xawisino garinni; Sidaamu qoqqowunni tantanamara albaanni laashshaano Industirra babbaxxitino jiffa giddo nooha ikkansinni laashshate dhuki woffi yiinoho.
Qoqqowu tantano adda ikkitu kawa kayinni laashshaano Industirra laalchonna laalchimma lossidhanno gede dandiisiissannota seerunna loossate gari wodho woyyeessine qixxeessinoonnita kayise;xaa yannara 300 haaruudde laashshaano Industirra uurrinsoonnita buuxisino.
Konninni, qoqqowoho Industiretenni laashshate dhuki 44% noowinni 57% widira lossa dandiinoonnita kulino.
Soorrote kawa woyyeessinoonniri gobboomu ikko qoqqowu poolise laashshaano Industirra jawaachishshannore ikkansa coyi’rinohu Sooreessu; mitte uurrinsha irkonni calla laashshaano Industirra laalchimma lossa dandiinannikkita kayse; konnira, hajamaano bissa qinaambe hasiissanota huwachishino.
Konni kaiminni, “Sidaamu qoqqowi Industirete latishshi amaale mine” uurrinsoonnitano qummeessino.
Kalaa Gosaye xawishshsi garinni; tayxe lede sa’u shoole dirra giddo 60 kume toone babbaxxitino waaco shiimmaadda, mereerimanna jajjabba laashshaano Industirarra shiqinshoonni. Konninni, 1.3 biliyoone birra looso harisatenna laashshinani maashine hidhora shiqinshoonni.
Kuri dirra giddo Industirete ekistenshiine qajeelsha 800 ikkitanno laashshanno Industirrara uynoonnitanna 300 haaruudde shiimmaadda, mereerimanna jajjabba laashshaano Industirra kalaqantinotano hatonni.
Laashshate dhukinsa woffi yiinori 1 kumenna 81 shiimmaadda, mereerimanna jajjabba laashshaanno Industirra irkisatenna kaajjishate looso loonsoonnita kulinohu Biirote sooreessi kalaa Gosaye; qoqqowoho Koovid-19, Agowanna babbaxxitino korkaatta kaiminni cufante keeshhsitinori 40 laashshaano Industirra giddonni 33 wirro loosu giddora e’anno gede assinoonnita qummeessino.
Qoqqowu gede handaarunni jawa illacha tunge loosatenni hattono “Itophiyu laashshito” yaanno adawarshinni hananfoonni millimillo qoqqowoho Industirranniha laashshate dhuka 44% noowinni 57% widira lossa dandiinoonnitano hattonni.
Qoqqowoho 54 ikkitannori laashshaano Industirra lamala addi addi handaarranni gobbaydinni eessinanni laalchubba gobbate goddo laashshatenni riqiwate loossanni noota xawise; sa’u lame dirrara calla gobbaydinni eessinanni laalcho gobbate giddo laashshatenni 750 miliyoone doolaare fulo gatisa dandiinoonnita coyi’rino.
Handaarunni sa’u shoole dirra giddo 3 kume 500 toone laalcho gobbaydi dikkora shiqishatenni 238 miliyoone doolaare ale gobbaydi woxu soorro eo afi’ra dandiinoonniha ikkanna; 65 kume ikkitanno qansootirano loosu kaayyo kalaqantonota lede xawisino.
Amsaalu Felleqe
Bakkalcho Woxawaajje 9, 2016 M.D
