Addis Ababa:- Dijitaale tekinoloje egennonni gobbakera hananfoonniha “Onte miliyoone koodere” kakkayishshinni wedellu gobbate ha’nura egennonni kalqoomu deerrinni heewisamaano ikka dandaanno kaayyo ikkase Sidaamu Qoqqowi Layinki Pirezidaantichinna Rosu Biiro Sooreessi kalaa Beyyene Baraasa coyi’ri.
Xaphoomu ministirchi Abiy Ahimed (Dr) gobboomu deerrinni hanafisiisinoti “Onte miliyoone koodere” woy onlaynete loosi kaayyonni Sidaamu qoqqowirano 3 dirra giddo 143 kume qansoota horaameeyye assate mixo amandoonnita kalaa Beyyene xawisino.
Xaa yannara kalqenkera yannitte tekinoloje iillitino deerri luphiima ikkasinni kalqoomu deerrinni heewisama dandaate yannitte tekinolojenni woyyaabbino egenno amada agarrannita huwachishino.
Qoqqowoho aantanno sase dirra giddo 143 kume qansoota qajeelsate uynoonni bikkinni tayxe dirinni 35 kumi ale qansooti qajeelte egennoa afi’ratenni kaayyote horaameeyye ikkitanno gede injeessinoonnita buuxisino.
Tenne kaayyo qixxeessitinoti Arawete Emireete Itophiyu mootimma ledo qinaawatenni ikkinna; wedella lede woloottu qansootino angansara noo bilbilinni woy kompiwuterenni noowa heedhe borreessamatenni baatooshshiweelo qajeelsha adhatenni kalqoomu deerrinni heewisama dandiisiissannota tajete woraqata afi’ratennui horaameeyye ikka dandiitannota egensiisino.
Dijitaale tekinoloje egennonni 5 miliyoone koodere kakkayishshinni wedellu gobbannita ha’nura egennonni kalqoomu deerrinni heewisama dandiitanno kaayyo kalaqantinotano lede huwachishino.
Gaazeexu Odeessaanchinni
Bakkalcho Woxawaajje 9, 2016 M.D
