Gorchee:- Gorchee woradira Kenneeru maazzagaajji harancho yanna giddo lophate kaayyo noosita hedote giddo woratenni dagate beeqqo kaajjinshe loonsanni hee’noonnita Quchumu maazzagaajji mini egensiisino.
Kenneeru maazzagaajji loosu harisaancho ikkinohu kalaa Daarimo Qaqqawo Itophiyu pireesete uurrinshara xawisino garinni; qooxeessu konni albaanni olluu mereersha ikke keeshshino.
2008M.D kawa kayinni quchumimmatenni tantaname maazzagaajjunni massagamanni no.
Mittu olliinni tantanaminohu Kenneeru quchumira xaa yannara 4 kumenna 500 ale ikkitanno teessaano heedhannota kule; quchumu giddo caabbichu xuruura halashshatenna teessaano owaante garunni afidhanno gede assinoonnita egensiisino.
Dooggate caabbichono halashshinoonnoha ikkanna; dagoomu xalalu anganni way owaanteno iillishate looso loonsoonnitano hattonni.
Kenneeru quchumi safami yannara 2 kume ikkitanno teessaano calla noota qaagiisse Kalaa Daarimo; xaa yannara kayinni mannu kiirono ikkito eote bueno lexxitanni daggino yiino.
Maazzagaajju mini loosu harisaanchi xawishshi garinni; Kenneeru quchumi hala’linyi 400 iskuweere kaaremeetire ikkanna; quchumunnita eote bue saadate hoowenni, madawetenni, gobbaydinni addi addi laalcho hogobbe e’anno kaameellanni kottenniha baatisiisatenni hattono kaadaasterete afi’nannita xawisino.
Quchumunniti diru eo konni albaanni 150 kume birra ikkasi kule; tayxe dirinni kayinni 550 kume birra eo gamba assa dandiinonnita egensiisino.
Albaanni quchumu pilaane kayinsi yannara 610 manni kaadaastere murannota qummeesse; tayxe dirinnino xaa geeshsha 580 manni muranno gede assinoonnita kulino.
Quchumaho giddo doogga, lolahu ha’ranno booenna lawinore safote latishsha dagate beeqqonni loonsanni hee’noonnita coyi’re; quchumu harancho yanna giddo lophate kaayyo noosihura aantanno ilamara lophino quchuma ragisiisate illachinshiine loonsanni hee’noommo yiino.
Konni dirinni calla 4.5 kiilomeetire ikkitanno doogo dagate beeqqonni loosantinota lede xawisino.
Bakkalcho Woxawaajje 2, 2016 M.D
