Alatta Wondo:- Wodiidi Sidaami Zoonera tayxe laalchu dirinni 13 kume hekitaare baatto aana haaro Weesete funta kaansoonnita Zoonete gashshooti egensiisi.
Wodiidi Sidaami Zoone gashshooti qaru gashshaanchi kalaa Mengesha Fiitamo; baxxinohunni, Itophiyu pireesete uurrinshara xawisino garinni; qoqqowu deerrinnino Weesete sircho halashshate assinanni hee’noonni wo’naalshi kaiminni Arakka gibrinnu mereershinni woyyeessinoonnire Weesete sircho abbisiinse loosidhe galtinori qajeeltanno mereershira batisate looso hala’ladunni loonsanni hee’noonni. Zoonete addi addi woraddara dooramino weesete sirchi noota xawise; dancha sircho batisatenni daganke sagalete umonsa dandiitanno gede illachinshe loonsanni hee’noonnitano guwursino.
Baxxinohunni, Alatta Wondi woradira, Bursanna Xexichu woradda haaruudde Weesete sircho batisate looso loonsanni hee’noonnita kayse; konninni, dagoomu woyaawinoha Weesete laalchonna laalchimma lossi’ratenni sagaleete wowe buuxisiisate illachiinshe loonsanni hee’noonnita xawisino.
Sidaamu daga konni albaannino babbaxxitinota Weesete sircho batinyunni laashshitanni sagalimmate, xaginaatehonna babbaxxitino horora hosiisidhannota kaysinohu Zoonete qaru gashshaanchi kalaa Mengesha; Weese sagalimmate calla ikkikkinni xaginaatehonna wolootta hororano hossannota xiinxallotenni bandoonni kaiminni daganke Weese agarroonni garinni latissanni miinjansano lossidhanno gede assate loonsanni hee’noonnita qummeessino.
Lawishshaho, Hulate woradira afantannore Weesete sircho Arakkinni abbinoonniri ledo heewinseenna woyyaawino sirchi nootanna hala’lado laalcho aa dandiitannota la’noonni yiinohu gashshaanchu; hakkiichinni haa’noonniha Weesete sircho Bursa, Alatta Wondo, hattono Xexichaho batisate looso loonsanni hee’noonnita huwachishino.
Weesetewiinni afi’nanni Waasanna wolootta waaco rosamino garinni calla horoonsi’nanniha ikkikkinni xaa yannara Yirgaalamete Qinaawino Gibrinnu Industire giddo babbaxxino garinni qixxeessinanni gobbate giddonna gobbaydi dikkuwara soyaate geeshsha iillinanni hayyo noota xiinxallo assinoonnita kayse; Weesete laalchinni albillicho sagalete wowe buuxisiisa calla ikkikkinni tekinolojetenni irkinse qixxeessatenni gobbaydi dikkora soyaatenni afi’nanni eonni miinju dhukano lossi’ra dandiinannita buuxisino.
Zoonete giddo konni laalchu dirinni calla 13 kume hekitaare baatto aana haaro Funta kaansoonni yiinohu kalaa Mangashi; dagoomuno Weesete laalcho batinyunni horoonsi’rannoha ikkasi kaiminni hala’ladunni laashshinanni hee’noonnita lede xawisino.
Yaareed Geetaachew
Bakkalcho Woxawaajje 2, 2016 M.D
