Addis Ababa:- Gobboomu amaalammete komishiine hedo gamba assate harinsho Wocawaaro 30,2017M.D geeshsha jeefantannota Gobboomu Amaalammete Komishiine Qaru Komishinerchi Mesfin Ariaya (P/r) egensiisino.
Gobboomu amaalammete komishiine qaru komishinerchi Mesfin Ariaya (Pirofeeser) Itophiyu pireesete uurrinshara xawisanni; tonne qoqqowubbara lame quchumu gashshoottara hananfoonnita hedo gamba assate harinsho Wocawaaro 30,2017M.D geeshsha jeefisate loonsanni hee’noonni yiino.
Amaarunna Tigirayete qoqqowubbara keeru kalaqami hedeweelcho baalantenni hedo badate giddora e’’ate qixxaawo assinoonnitanoi Komishiinerchu Mesfini xawisinohu.
Mite mite qarqartora leellannohu keeru hoongi mereerima xiiwo kalaqirono hananfoonni basera hedo gamba assate looso garunni gumullanni afammanni yiino.
Hedo gamba assate looso Wocawaaro 30,2017 M.D geeshsha xiimboonnihu Affaarete qoqqowira xaa yannara luphi yino iibbilli noo yanna ikkasenniiti yiino.
Komishiinennihu qaru loosi hanqafaanchonna beeqqisiisaancho ikkitinota gobboomu amaalamme harisa ikkinohura bisu xe’ne noonsari gambooshshe qixxeessitinno yiinohu qaru komishinerchi; gobboomu amaalammete komishiine baalunku qansootira gutu bare qixxeessitanni gobboomu sumimme kalaqantanno gede loossanni afantannota huwachishino. Pirofeeserchu Mesfini; amaalammete illachi dagatewinni gamba assinoonni hedo garunni bande doorantino gobbate riqiwamaano widoonni hasiisanno hasaawa assine sumimmete aana iilla ikkinota kayisino.
Amaalammete harinshora xaa geeshsha hiittino gobbayidinna giddoyidi anga e’inokkita qummeessannohu Pirofeeser Mesfini; ikkollana, baalanti poletiku paartuwanna qodho tirtinokki sharramaano gobboomu amaalammewa karsama hoogansa umise xiiwo kalaqqanni afantannota xawisino.
Pirofeeser Mesfini xawishshi garinni; amaalammetenni wolootu gobbuwa wo’naalsha adhine anga wodhatenni co’o assinoonni.
Lawishshahono Yemenetenna Sudaanete gobboomu amaalamme mootimmatenna wolootu angansa wortino daafira gumiweeltinota kayisino. Gobboomu amaalamme gumulamara tuqu xaadooshshuwa qeechi luphiima ikkasinni hasiissanno irko assitanno gede woshshatto assino.
Qiddist Gezzaheny
Bakkalcho Woxawaajje 2, 2016 M.D
