Addis Ababa:- Hawaasi quchumira hanafaminohu dooggate qacce latishshi loosi daa”attote latishsha lossannoha ikkasi Quchumu Gashshooti xawisi.
Hawaasi quchumi kantiiwi kalaa Mekuriya Mershaye Itophiyu pireesete uurrinshara xawisino garinni; muli yanna giddo quchumaho hanafaminohu dooggate qacce (koriiderete) latishshi loosi quchumu xawishsha soorrannoho.
Koriiderete latishshi doogo biifisate loossa hanqafino, shalleettetenna lekkaasinu doogga badinohonna bisu xe`ne noonsare hedote giddo worino garinni gumullanni hee`noonni yee; jeefisamanno woyte quchumaho ledote biinfille aatenni quchuma daa”attanno turistooti kiiro lexxitanno gede assatenni daa”attote handaarinni saeno miinja lossatenni jawu qeechi hee`rannosita xawisino.
Quchumaho koriiderete latishshi loosinni lamu dani loossa hanafantinota coyi`rinohu kantiiwu; loossa halashshinanni qarqartora loonsannitanna quchumu mereero gumulantannota sase doogga amaddinota ikkase buuxisino.
Halashshote loosi 34.5km dibbanno, 10 jajjabba doogga diwannoha ikkasi buuxise; umi doycho loosinni 813 ka’annorira kiiso baante kaysate loossa gumulantanni noota xawisino.
Quchumu mereero loosantanno 7.5km dibbannota sase qara dooggara balaxo aatenni gumullanni hee`noonnita kalaa Mekuriya buuxise; dooggate deerra woyyeessate loossa gumullannino yiino.
Doogga Hayile Riizortenni albi maazzagaajja, Membo kaaffenni Hawaasi Riferaalete Hospitaalenna DMCni Hawaasi Yuniveristenna kolishshu way geeshsha noo doogga ikkansa xawisinohu kantiiwu; dooggate deerra woyyeessate, lekkaasinu, shalleettetenna bisu xe`ne noonsari horoonsidhanno doogga, dagate shumate minnanna woloottano amaddanno gede assatenni lattannota coyi`rino.
DMCni Hawaasi Seeraamikisete faabiriki geeshsha noo doogote latishshi qarqaraho noo uurrinshanni latannota buuxise; uurrinshuwa doogo latisate hedotenni 1 biliyoone birri geeshsha fulo ikkannota xawisino.
Loosunnihu umi gafi shoole aganna giddo jeeffanno yiinohu kantiiwu; layinki gafi loossa hanafantanno baseno xiinxallinanni hee`noonnita buuxisino.
Loosu lame biliyoone birra kaapitaale fulo xa`mannota xawise; dagate beeqqonna uurrinshuwa latissannoha lede 3 biliyoone birra fulo hendannita coyi`rino.
Kantiiwu xawishshi garinni; quchumu teessaano koriiderete latishshi looso hedotenni, woxunninna mooraaletenni irkissanni no. Hanafaminohu latishshu loosi quchumu gashshootinni jawa pirojekite ikkasi buuxise mixi`noonni yanna giddo jeefisamanno gede luphiima harunso assinanni hee`noonnita huwachishino.
Abbebech Maatewoos
Bakkalcho Maaja 25, 2016 M.D
