Gaambeella:- Gaambeellu qoqqowira amaalammete ajanda gamba assate gafinni baqqi yitino dagate beeqqo assa hasiissannota Gobboomu amaalamme komishiine egensiissu.
Itophiyu gobboomu amaalamme komishiine Gaambeellu qoqqowira babbaxxitino dagoomu kifilla riqibbino dooramaanonna hajo la`annonsa bissa ledo ajandu hedo gamba assate bare tenne lamala giddo harisa hananfoonni.
Itophiyu gobboomu amaalamme komishiine komishiinerchi Melaaku Woldemariyaami barete hanafo aana xawisino garinni; komishiine amaalete harinshonni baca xeertinye hodhatenni amaalete ajanda ikkitara dandiitanno hajubba gamba assitanni afantanno.
Konninni, quchumaho ajanda badate amaalete gafa harinsoonnita hattono sa`u lamalanni hanafe Benishaangul Gumuzete qoqqowira ajandu hedo gamba assate harinsho aana noota buuxisino.
Gaambeellu qoqqowi teessaanono dagganno barrubbanni assinanni amaaletenna ajanda gamba assate harinshonni baqqeenyunni beeqqo assa hasiissannonsa yiino.
Amaalete harinsho hanqafaanchonna beeqqisaancho, addaxxissannonna xawado ikkitino harinsho heedhannose gede hala`lado balaxote qixxaawo looso loonsanni keeshshinoonnita xawise; beeqqaano gobbate lophora kaa`litanno hedubba kayisatenni amaaltannonna ajandu hedonsa qixxeessitanno bare ikkitannota coyi`rino.
Komishiine Gaambeellu qoqqowira qixxeessitino tenne ajanda gamba assinanni amaalete gafanni siivikete maamarra lede qoqqowoho afantanno poletiku paartuwa, amma`note uurrinshuwa, 1 kumi 300 ali riqiwamaano beeqqitannotano xawisino.
Komishiiner Melaaku xawishshi garinni; amuraatu aana sase qara qara assootubba gumullanniha ikkanna; beeqqaano amaaletenna hasaawunni ajandu hedonsa abba, ajandubbansa gutunnita assanna kaajjisha hattono malu hedubbanna xaphishshu ajanda aa amuraatunniha mitto bisooti.
Harinshote jeeforano babbaxxitino hajo la`annonsa bissa gobboomu amaale songonni beeqqaano ikkitanno riqiwamaano doortanno yiino.
Konni gafinni gamba assinanni ajandino lowontanni qara ikkitino gobboomu hajubba aana illachishinoha ikkasi buuxise; daga mala afira noonsa yitannota gobboomunna qoqqowu hajubba kayissanno yine agarrannitano xawisino.
Ikkinohura, komishiine gumultanni nooti amaalete harinsho baalanka beeqqisiissinota ikkatenninna qarrubbate mala woratenna hegeraamo keere buuxisiisa dandiisiissanno jawa gafa ikkasenni baqqeenyu beeqqo assa hasiissanno yiino.
Barete meentu, bisu xe`ne noonsari, amma`note annuwi, rosiisaanonna gobbate geerri beeqqitino.
Abbebech Maatewoos
Bakkalcho Maaja 25, 2016 M.D
