Addis Ababa:- Tigete toanna lolahu danora reqeccaabbino qooxeessubbara balaxote qoropho loossa gumula hasiissannota Sidaamu Qoqqowi Danote Bidhatto Loosu Massago Komishiine xawissu.
Komishiinete komishiinerchi Kalaa Aberra Wiila Itophiyu pireesete uurrinshara xawisino garinni; Sidaamu qoqqowi Mereerimi Sidaamu zoone Wonshi woradira kalaqantino tige danonni iillitino gawajjonni manni lubbamino.
Kalaa Aberra xawishshi garinni; Woradaho 18/2016M.D hanafe sase barrubbara seeda saatera kaajjado xeena ganino.
Alichaame qooxeessubbara hee`ranno kaajjadu xeeninni buichubba bikku aleenni burqitanno yiinohu komishiinechu; baxxinohunni gaaraame qooxeessubbara aliidi bushshinna kinchu mereero xorre eatenni baxxanno gede assannota huwachishino.
Wole widoonni, Burru woradira ganino xeeninni laayyo bikku aleenni wo`mitinota xawise; tenne danonni lamu qaaqquulli lubbaminota buuxisino.
Qoqqu gede xeenu korkaatinni kalaqantino danonni xaphooma 11 manni lubbo ba`inota kalaa Aberri xawisino.
Tenne danora reqeccaabbara dandiitanno yine hendanni alichaamenna worichaame qooxeessubbara bikku aleenni ikkino xeeni gananno woyte tigete to“a xaaddara dandiitannota coyi`re; aliidi layyonni gananno xeeni gammoojjitte qooxeessubbara du`namannohura lolahoho reqeccaabbanno yiino.
Xa yannara bikku aleenni gananno xeeninni baadiyyete woradda calla ikkitukkinni quchummano reqeccaabbannota qummeesse; baadiyyeteno ikko quchumaho hee`ranno dagoominna hajo la`annonsa mootimmate bissa moola ishine tunganni amanyooti aana qoropho assa hasiissanno yiino.
Kalaa Aberri tigete to“ara reqeccaabbino qooxeessubba bande dagoomu ledo balaxote qorophote loossa gumula hasiissannotano sokkasi sayisino.
Abbebech Maatewoos
Bakkalcho Maaja 25, 2016 M.D
