Addis Ababa:- Sidaamu qoqqowi pirezidaantichi kalaa Desta Ledamo Mereerimu Sidaamu zoone Wonshi woradira kalaqantino tige to’’ate danonni gawajjantino maate Yirgaalamete Hospitaalera afantannore hattono dano kalaqantino basera afame towaatino.
Pirezidaantichu, gawajjamanno basete leelle sheshifachishi yannara xawisino garinni; qoqqowu mootimma dano kalaqantu yannara hasiissanno irko assinanni gede wiinamu dawaro uyinoonni.
Hattono ledote dano iillitannokki gede sharro assinoonnita xawise; konninni, ledote dano gatisa dandiinoonni yino. Iillitino dano qoqqowu mootimmanna wo’manta Sidaamu daga dadillissinote yiinoha ikkanna; qoqqowu mootimmanna daga qoti’nera no yiino.
Danote reqeccaabbino qarqartora heedhanno daga qoropho assitanno gede; hattono togoo qooxeessinni xeertidhanno gedenna mootimma qixxeessitino basera fooliishshidhanno gede huwachishino.
Gawajjamaano towaanyo assini yannara Sidaamu qoqqowi Jreenyu paarte borro mini sooreessa kalaa Abrahaam Marshallo lendanna qoqqowunna zoonete loosu sooreeyye afantino.
Pirezidaantichu Desta Ledamo Mereerimu Sidaami zoone Wonshi woradira sa’u muli barrubba giddo tige to’eenna kalaqantino danonni gawajjantino manni daafira macciishshaminosi dadille xawisino.
Dano kalaqantu yannanni kayse gawajjamaano irkisatenni ledotenni gawajjo iillitannokki gede assate qoqqowu mootimma zoonete gashshooti ledo hala’lado loossa gumultanni noota kaysinohu Pirezidaantichu; gawajjamaano rahotenni xaginaatu owaante afidhannonna woloottano mannihimmate irko assitanno gede qoqqowu danote bidhatto loosu massago komishiinenna ga’labbote bissa basete geeshsha bobbaansoonnita coyi’rino.
Wolootta qooxeessubbarano labbino dano iillitannokki gede dagoomu balaxote qoropho assa hasiissannota huwachishe; danote korkaatinni lubbantinori daafira macciishshaminosi dadille xawise;gawajjamaanote maatera shesho halchino.
Qiddist Gezzaheny
Bakkalcho Maaja 25, 2016 M.D
