Addis Ababa:- Dagate riqiwamaano amaale mini wiinamu lallawinni Itophiyu kalqoomu latishshu maamarra ledo assitinota fayinaansete irko sumimme roorima huuronni kaajjishi.
Ministirootu amaale mini bero harisino 38ki uurrinshu gambooshshinni kalqoomu latishshu maamarra ledo assinoonnita fayinaansete irko sumimme kaajjishate qixxaawino lallawi aana hasaawe muro sayisino.
Kalqoomu latishshu maamarra ledo assinoonniti fayinaansete irko sumimme 1.5 biliyoone Ameeriku doolaare afisiissannoha ikkanna; konni giddonni 1 biliyoone Ameeriku doolaare kaa`lotenni, 500 miliyoone Ameeriku doolaare qole liqootenni afi`noonnite.
Amaalete mine mootimmate woshshamaanchi ministirchi Tesfaye Beljige (Dr) liqoote sumimme lallawa lainohunni uyino xawishshinni; soorrote gedensaanni loosu aana hosinohu umiti ha`nura miinju woyyeesso baca giddoydinna gobbaydi jiffa dandiite dancha guma borreessiissino yiino. Sa’u soorrote dirrano 6.2 xibbuunni lopho borreessiisa dandiinoonnita ikkase buuxinsoonni.
Layinki ha`nura miinju rifoorme millimillonni; maakirote hiiqqamme sissate hattono umi gafanni afi`noonni guma sufisiisate illachunni loonsanni hee`noonni yiino.
Konni garinni; maakiro ikkonome geisate baxxinohunnino loosu kaayyo kalaqora, waagu iibbabbo ajishate qorqorate, gobbaydi soorro anje gatisatenna tantano biddi assate dandiissitanno rifoormete loossa gumulantanni no yiino.
Liqootenni afi`noonni woxi wo`munni wo`ma mitteege mootimmate kaazinira e“annoha ikkanna Itophiyu mootimma hanaffinota rifoormete loossa irkisate hattono federaalete mootimma 2017 baajeettenni suwashshunni irkisate hosannoha ikkasi buuxisino.
Baxxinohunni, 500 miliyoone doolaare liqoo qallotenni co`itte; baanke murtanno garinni horote aana hosinokki liqoote woxi aana dirunni 0.5 xibbuunni iillanno gadachote baatooshshe baantara dandiinanni yiino.
Baanke liqoote birr massagate ragaanni uytanno owaantera xibbuunni 0.75 owaantete baatooshshe baantannitano huwachishino.
Ledoteno, liqoo lewu dirita coccolu yanna lede 38 dirra giddo baante jeefinsannita ikkase xawise; amaalete mini irkote sumimme kaajjishanno gede xa`mitino.
Amaalete minino irkote sumimme aana hasaawihu gedensaanni roorima huuronni kaajjishino.
Abbebech Maatewoos
Bakkalcho Maaja 25, 2016 M.D
