Addis Ababa:- Haanju harumi mixo dubbu buujjama ajishate kaa’lo assitinnota Itophiyu dubbu latishshi egensiisino.
Itophiyu dubbu latishshi massago miillanna loosaasine Hawaasi quchumi gashshooti Tullo olliira Kuyiwata laayyo aana afantanno basera haanju harumi chigginye kaassino.
Chogginye kaasate amanyooti aana kalaqamu haqqe lendanna duuchu dani horo uyitanno chigginyuwa kaansoonniha ikkanna; ejersu, gammoojjete leemminna wollotuno kaasantino. Kunino Hawaasi Garbanna quchumunnita kalaqamu amado agarate hattono gawajjantino base xagisate kaa’litannore ikkansa kulloonni.
Chigginyete kaashshira qoteho 100 irko hasidhanno rosaanora rosu uduunne quchumu gashshootira uyinoonni.
Itophiyu dubbu latishshi qaru dayirekterchi kalaa Kebbede Yimaami tenne yannara coyi’rino garinni; haanju harumi mixo hananfi kawa dubbu buujjama tiro afi’rino garinni ajinshoonni.
Baxxinohunni, haanju harumi mixo millimillonni kainohunni dubbo dolate assooti yanna yannatenni ajanni daasinni diru dirunkunni dolamanno dubbi bikki ajanni dayino yiino.
Dubbu latishshi loosi giddo chigginye kaasa calla ikkikkinni amadooshshe assine ciirtanno gede assate huwanyooti bowiranni dayinota qummeesse; konninni, gobbate gede kaasantinoti ka’’ate bikki 80% ale iillinota xawisino.
Hawaasi quchumi gashshooti kantiiwi kalaa Mekuriya Mershaye isi widoonni; Hawaasi quchumi gashshootira sa’u dirra giddo haanju harumi mixo addi addi horo noonsa chigginyuwa kaasantinota coyi’rino.
Baxxinohunni, diilallote gade soorro taashshatenna sagalimmate hossannore hattono lolahu hoshooshannokki gede gargartanno chigginyuwa kaasantinota kayse; ka’’ate bikkinsa 86% ale ikkinota huwachishino. Sidaamu qoqqowi dubbu, qooxeessunna diilallote gade soorro biilloonyi qaru dayirekterchi kalaa Shittaye Yumura tenne yannara xawisanni; qoqqowu sa’u dirra giddo luphiima kiiro noonsa chigginyuwa kaasantino yiino.
Konninni, qoqqowu duuchu ragi soorro abba dandiinota kule; lawishshaho; qoqqowu dubbu iillo lexxitinotanna gawajjantino baatto laashshate widira higganni afantannota qummeessino. Qoqqowoho tayxe diro addi addi horo afidhino chigginyuwa kaashsho qinaawino garinni gumullanni hee’noonnita qummeesse; baxxinohunni waaxote gibrinnira kaa’litanno chigginyuwara baxxino illacha tungoonnita xawisino.
Diilallote gade soorronni dagganno mitiimma gargarate widoonni haanju harumi loossa gummaaamete yiinohu kayinni Dagate riqiwamaano amaale mini gibrinnu hajubba uurrinshu komite gambisaanchi kalaa Selemoon Laalleho.
Baxxinohunni, sagaletenni umo dandaatenna kaa’lamaanchimmatenni fulate assinanni hee’noonni sharro gumulsiisate haanju harumi mixo qarunni hasiissannota ikkasenni baalunku qansooti kaajjado beeqqo assitara hasiisannota huwachishino.
Qiddist Gezzaheny
Bakkalcho Maaja 11, 2016 M.D
