Shumate boombe madi’ra shumate amanyooti bissa (mule, shumate ufuuffanna aliidinna eeliidi shuma sayissanno boombe) gawajjitanno madi’rate danaati.
Batinye mada woriidita shumate boombenna shumate ufuuffa gawajjitannoha ikkanna mada shumate ufuuffa sa’e mulunniwa sa’uro luphiima fayyimmate qarra kalaqqara dandiitannota handaaru ogeeyye kultanno.
Shumate boombe madi’rara reqecceessitanno coyubba maati?
Shumate boombe madi’ra kalaqantannohu baakteeriyu shumate boombe giddora e’’e siranno woyteeti. Shumate boombe kalaqamunni baakteeriya gargartara kalaqantinota ikkiturono; mite yannara kalaqamunniti gargarooshshu doogo loosu harinsho qeelatenni baakteeriyu mannimmate giddora e’e dhibba abbitara dandiitanno.
Wolu kalaqamunni sirote kifile ofollo korkaatinni siimu xaadooshshi yannara otoottote giddo waammannihu maatete damboowishshi hattono meentu ilate yannansa gudanno yanna shumate boombe madi’rara luphi yino deerrinni reqeccaawanno gede assitannonsa kullanni.
Kunninni ledote, keeraancho ikkitinokkiti shumate boombe heedheennansa ilamanno qaaqquulli, shumate boombe beewa, mulu care, dhibbu gargarooshshi amanyooti gawajjama, mannu loosinoti shumate boombe (Kateter) horonsidhanno xissamaano, shumate ufuuffa, mule darte xagisidhinori shumate boombe madi’rara roorenkanni reqeccaabbinore ikkitanno.
Hiittoonni gargadha dandiinanni?
-Ikkado waa aga;
-Siimu xaadooshshi gedensaanni shumate boombe qooxeessa co’eessi’ra;
-Ikkado waa agatenni baakteeriyu fulanno gede assa;
-Seennu babbaxxitino sirote kifile co’imma agadhinannire dodoraantenna pawudere lawinore horonsi’ra hooga;
-Maatete damboowishshi doogga soorri’ra hasiissuro xagisaano amaa’latenni (baxxinohunni marro marro shumate boombe madi’ranni amadammanniha ikkiro) shumate boombe madi’ra gargadhate kaa’litanno.
Qiddist Gezaheny
Bakkalcho Woxawaajje 4, 2015 M.D
