Hedeweelcho bisi`ne aana macciishshantanno`ne xissote macciishshammenni caacceessitannoti hinkote qooxeessira kalaqantanno xisso ikkitukkinni digattanno. Saga`linanni yannara qaqqasa, waa anganni woyte bodi’ra woy qiidu kisannose woyte luphiima xissote macciishshamme sayisa konni qarri xawishshubbaati.
Baca yannara adhinanniti yannate geeshshi xagga kalaqantannonke xissote macciishshammenni fooliishshi’rate adhinanni malu qaafooti. Sae saeno xagisote uurrinsha ha’ratenni ba`ino hinko fushshiishanna hunano malu gede assine adhinara dandiinanni.
Konni gobbaanni kayinni hinko butukantukkinninna xisso hanaffanno woyte luphiima ikkitino hinkote xisso ga`labbisate waajjo tumanna qurunfude horonsi’ratenni xagisa dandiinanni. Lamunku noonsa luphiima horo kaiminni konne lawino qarrira lowo geeshsha dooramaanotenna amaallannireeti.
Konne afi’rate qole shotunni xisso macciishshantanno`ne base aana qurunfude woy waajjo tuma wodhanna boode saatera ga`mine amadanna shantanno woyte gawajjantino hinkonni corqanna boode xiqqeessubbara ga`mine keeshshiishanna tufe huna. Woy qole, lamenka shanshine udulatennina zaytete gede qixxeessatenni co`ichu fuuttinni gawajjantino base aana duna.
Hakkiinnino boode xiqqeessubbara keeshshiishanna lulluqantikkinni tufa, 15 xiqqeessinni boco saate geeshsha amade keeshshiisha hasiissanno. Togo assatenni macciishshantanno`ne hinkote xissonni umo`ne xagisa dandiitinanni. Waajjo tumanna qurunfude bashshonni hanafe babbaxxitino xissuwara adhinanniha ikkanna; baxxinohunni qole afuu ledo amadisiisamino fayyimmate qarrira malaho.
Lawishshaho, waajju tumi taaltino mundeete doyicho amanyootira kaa`lannoha Iwugnel yinanni karso giddosi amadino. Kuni qole godowunna afuu fayyimmara lowo geeshsha kaa`litanno shiilo ikkanna; konninni saeno miqichu kaajjillira kaa`litanno haammata karsubba amadino. Baakteerranna hasiissannokki coyibba bisu giddonni fushshatenna hunateno lowontanni kaa`lanno.
Bakkalcho Maaja 27, 2015 M.D
