Godowu game batinyunni hedeweelcho kalqantanno xisso ikkitanna; luphiima ikkitino xissote macciishshamme godowinke qooxeessira macciishshantannonke gede assitannote. Xisso rakke agurtankera dandiitannota nafa ikkiturono mito mito woyte kayinni seeda saate adhankera dandaanno. Tenne yannarano rahotenni mala hasi’ra noonke.
Xisso ga`labbisate uynanni xagga ledotennino kuri kalaqamunni afi`neemmo coyibba godowu game rahotenni ga`labbisate kaa`litanno hayyubbaati yinanni:-
1. Jaanjiweelu:-
Jaanjiweelu birqiiqinni hanafe babbaxxino dani xissuwara xagichimmate horo aana hosanna keeshshino. Muli yanna giddo fultino xiinxallo leellishshanno garinni; giddosi “anti infilamation” wolootta haammatta horo noonsa shiilubba amadino jaanjiweeli godowu game ga`labbisatenna mini giddo shotu garinni xagisi’rate kaa`lanno.
Konnirano godowu game xaaddannonke yannara jaanjiweelo qixxeessi’ratenni aga woy hiinca godowu game shotu garinni xagisate kaa`lanno.
2. Geinto ado:-
Godowu giddo Sagale daahama hoogguro ayirrankera dandaanno; sagale daahantukkinni seeda saatera keeshshituro qole godowinke qooxeessira game labbino xissote macciishshamme maacciishshantannonke gede assanno. Togoo qarri kalaqamannonkekki gede qara gargadhinanni doogo qole geinto ado saga`late. Korkaatuno geinto ado giddose noo shiilubba godowinke qooxeessira ayirrannonke gede assitanno coyibba hunannonkehuraati.
3. Qarafu sha”e:-
Godowu game xaaddannonke yannara qooxeessinkera qarafu makimaano heedhuro mitte birciqqo gammuutino waay giddo boco maanka qarafu makimaano ledatenni 2-3 xiqqeessi geeshsha seekkine karsiisamanno geeshsha agara. Jeefoteno karsiinsoommoha shaete gede angammora amaallanniha ikkanna; godowu game xaaddannonke yannara tenne doogonni horonsi’ra xisso ga’labbisate dancha hayyooti.
4. Durishantino daabbo:-
Godowu game sagalete hadhaawa woy alkoolete ledo amadisiisante kalaqantunkero durishantino daabbo saga’la danchaho yinoonni. Korkaatuno durishantino daabbo giddonke noo hadhaabbino coyibba ajishatenni bisu hifama gargartannohuraati.
Tenne kalaqamu doorshubba horonsi’ratenni shotunni godowu game ga’labbisanna xagisira dandiineemmiha ikkanna; xisso kayinni kawiinni roore iibbabbituronna wirro wirro kalaqantunkero fayyimmate uurrinshira haratenni fayyimmate ogeeyye amaa’la danchate.
Abbebech Maatewoos
Bakkalcho Maaja 20 , 2015 M.D
