Loome Vaytaamin B na C ni, Foosferesetenni, Pirootiinetenna Kaarbohaydireetete jiroo’mitino laalooti. Loome Filavoyid yinanni shiilo giddose amaddanno. Tini shiilono kaansere gargartanno. Loome babbaxxino garinni horonsi’ra dandiineemmo. Lawishshaho:- Loomete shae, Loomete keeke, Loomete zaytenna Loomete Saamuna horonsi’ra dandiinanni. Kurinni ledote xaginaatu horoseno luphiimate.
* Loomete xaginaatu horo aantannoreeti.
1. Kokkete madi’ra gargadhate
Loome kokkete madi’ra gargartanno gummate laalo mereerinni mitte ikkitanna Baakteerya gargarate wolqa noosehura Loomete huuncamme wayi ledo karsiinse woy Shaete garinni qixxeessi’ne angiro horose luphiimate.
2. Loome intoonni sagale rahotenni daahantanno gede assatenna godowu moolle gargadhate kaa’litanno
Sagalete giddo shiima loomete waa cophi assa garaho. Ikkollana, Loome adote ledo karsiisa hasiissannokkita habbinoonte. Loome mundee keereensitanno; ledoteno dancha co’eessate kaa’litanno.
3. Iibbabba ajishate
Qixxeessinoonnita Loomete huuncamme qiidunni, buusanotenna iibbabbate qarri noonsa mannootira ikkado xaginaateeti. Bisinke iibbabbilli rahe rahe hunkiishshannonke gede assatenni woyyeessitanno. Taalu bikki noonsare kalaqamu malawonna Loomete huuncamme karsiisatenni woy Loomete shae horonsi’ratenni buusano hursi’ra dandiinanniha ikkanna kaajjado kokkete dhibba hursate kaa’litanno.
4. Hinkote amadooshshira kaa’litanno
Loomete huuncamme Hinkote amadooshshiranna xaginaateho kaa’litanno. Hinkote xisso xaaddannonke yannara iibbado Loomete huuncamme xisso macciishshantanno baycho wodhatenni xisso woyyeessi’ra dandiinanni. Kalaqamu Loomete huuncammenni Gaangaana riqqa Kelleshshate mundaanna bushu afuu fooli ledo amadisiisantino qarrubbanni gatissanno. Ledoteno duucha woyte Hinko, hinkote burushenni hayshshira hasiissanno.
5. Gogu darshe woyyeessitanno
Loomete huuncamme gogu darshe gargartannoha ikkanna bisinke aana noo darshe aana wodha; hattono way ledo karsantino Loomete huuncamme aga mulu cirracha gargadhate lowo geeshsha kaa’litanno.
6. Giirantino mada hursitanno
Loomete huuncamme giirantino bisinke mada aana wodha bassu hee’rannokki gede assitanno. Loome bisonke qiissate amali noose daafira giiramatenni kalaqantannota ruqanu xisso macciishshamme woyyeessitanno.
7. Giddoydi mundaa gargartanno
Loomete huuncamme giddoydi mundaa gargartanno. Korkaatuno, Loome Jarmenna Baakteeriya gargarate amali noose daafiraati. Sanote mundaa gargarate Loomete huuncamme giddo worroonni fuutta sanote xullo giddo worre shiima xiqqeessa keeshshiisha amaallanni.
8. Shekkeeretenna koleeru dhibba gargadhate
Loome mundee co’isate dhuka afidhino daafira shekkeerenna koleera labbino xisso gargartanno.
9. Lekka tidhantanno gede assitanno
Loome kaajjado foolenna baakteerya gargarate wolqa afidhino daafira gammuutino way giddo Loomete huuncamme worre lekka giddo wodha lekka tidhantanno gede assitanno.
10. Gogu amadooshshira
Loomete huuncamme geedhimma gargartannoha ikkanna gogu shoshshoggamanna gogu aana noore shiimaadda bixxiilluwa hattono babbaxxino qarra Jarmenna Baakteerya gargarate amali noose daafira kuri hoolate kaa’litanno.
11. Mikitatenna hirrete xisso gargadhate
Togoo xisso duucha woyte dirunni xiibbino mannooti aana leeltannoha ikkanna Loome hasiissannokkita bisu giddi du’namaano gargaratenni xisso woyyeessitanno. Konni gobbaanni bisinke giddo noo baakteeryanna hadhaamo coye gargartanno.
12. Qelpheepho ajishate
Loomete huuncamme gammuutino wayinni malawunni karsiinse aga bisu qelpheepho ajishate kaa’litannonke.
13. Foo’late qarra taashshitanno
Loome Vaytaamin C ni jiroo’mitinota ikkitino daafira Asmetenna foo’linanni bisu kifile qarri noonsa mannootira lowo geeshsha kaa’litanno.
14. Mundeete xiiwo woyyeessitanno
Loomete huuncamme aga giddose potaashiyeeme amaddanno daafira wodanu dhibbinni qarrantanno mannootira kaa’litanno. Luphiima mundeete xiiwo, gaggawa, hawwu yaanna looqqi assa gargaratenni surrenkenna mannihimmanke tittidhantanno gede assitanno.
15. Umu dananchi amadooshshira
Loomete huuncamme umu danancho xagisatenni luphiima qeecha afidhino. Forofore, dananchu buqqisamanna umu qoonchi ledo amadisiisantino mitiimmubba gargarate Loomete huuncamme umu qoonchi sammo aana buudha horo afidhino. Loomete huuncamme umoho buudha dananchu bilicci yaanno gede assitanno.
Bakkalcho Maaja 13, 2015 M.D
