Sukkaarete xisso yannantenni xagisa hoongiro, xagga garunni adhanna saga`late amanyoote taashsha hoongiro hattono hee`nanni gari soorrama hoogiro batinye bisinke amanyooti aana gawajjo iillishshanno. Baxxinohunni, lowo geeshsha dirritannonna gotti yitanno mundeete bikka heedhanno woyte qarrubba roore kalaqamate kaayyo noonsa. Sukkaarete xisso harancho yanna giddo kalaqantannonna yanna hadhu kiiro keeshshite iillishshanno qarrubba no.
Harancho yanna xissuwa;
- Keetoonete asiide batira. Bisu giddo nooti Insuliine co`ontanni ba`aranna Insuliinete loosi gobbaanni loossanno Gulukaagooninna Katekohlamiin labbino hormoonooti batidhanno woyte kalaqamanno. Tenne yanna looqqi assanna tushshiisha, ayirritanno godowu game, foolu ta“a, way goo’ro, baca shuma shumaaranna hawwunaate labbino malaatta wodanchinanni.
- Wole luphiima mundeete gulukoose luphiima mundeete karsuwa ledo heera kalaqantannoha ikkanna way goo’ro, shumate bati’ra, shontenna hawwunaate labbino malaatta kalaqantanno.
Seeda yanna xissuwa;
- Illete giddo afantanno mundeete nigga sukkaarete xisso korkaatinni babbaxxitino soorro harissanno. Tenne yannarano mundee, mundeete nigi gobbaanni du`nantanno gede assanno. Tenne yannara qole shaanga, umu damuume, illete xisso, la“ate qarrama woy la“a hooga kalaqantanno.
- Mulu xisso iillishanno. Seeda yannara keeshshitino mundeete gulukoose bikka batira mulu mundeete doyicho aana qarra abbasinnino ledote mulu giddo qara loosu harisaano ikkitino shiimmammaadda mundeete nigga suude soorratenni mulu loosi aana qarra kalaqqanno.
- Xisso keeshshitanni hadhu kiironna mundeete gulukoose bikka agarate aana qarru heeriro nervete qarri kalaqamate kaayyo lexxitanno. Lamente lekka aana hee`ranno nervete qarri batinyunni leellanno danaati.
- Sukkaarete xissonni gawajjamino manchi lekka aana baca gawajjo kalaqantanno. Lekkanniti mundeete niggano xissotenni gawajjantannohura hiitti madano rake hurtannokki gede assitanno.
- Wole sukkarete xisso sagale bisu giddo assitanno millimmo woy harinsho aana qarra kalaqqannohura salto sagale daahate amanyooti aana mitiimma kalaqqanno; hattono sagale saltotenni helleete giddora filantanno yanna ledanna helleete aana sagalete luuxo keeshshiishshanno.
- Sukkaarete xisso heedhanno woyte siimu widira iillitannoti mundeete du`name bikka ajishshannohura xissamaanchu siimu xaadooshshi qarri xaadasira dandaanno.
- Mundeete giddo sukkaarete bikka batira jarmootaho dancha sirote akata kalaqannohura hinkotenna gaangaanu aana infekishiine kalaqantanno gede assitanno.
Bue:- Sewasew Health
Bakkalcho Ella 29, 2015 M.D
