Abrahaam Saamueel
Itophiyaho haammatu gaancenna gibbo tirranni budu amanyooti noose. Konni albaannino ikko tenne yannara hiikko qooxeessirano gaancenna gibbo heedhuro daga ka`ino gibbonna gaance qiissate gaance tirranni hayyonna amanyoote horoonsidhanni daggino. Mitte mittenti daga nooseha gaance tirate amanyootenna hayyo horoonsidhe qarqarinsa budi garinni gibbote mereero araara kalaqqanni qarqaransa geisatenni sa`e gobbansarano duucha horo uytanni no.
Itophiyaho baalante qooxeessubbara konne mule ikko xeertote addi addi gaancenna gibbo ka`anna la`nanninna macciishshinanni keeshshinoonni. Gaance, gibbo, olunna addi addi sumuu yaa hoogate ikkito daga daganniwa babbadate korkaata ikkannoreet. Konnira kaima ikkannori, maati yiniro, wolu danna xiiwa, gosa gosanniwa giwama, jaddo loosa (manna shaa woy gawajjo iillisha), dannunni xaaddanno wole daga ledo sumimme hoogga korkaataho.
Gaance tirate noo amanyooti qarqaru qarqarunni baxxannoha ikkirono; qaru coy kayinni, gaancenna gibbo tirre qooxeessu keere afi`ranno gede assate. Gobbate giddo ka`anno gaance tirate duucha yannara lawishsha assine adhinanni amanyooti haammatu nafa heeriro; Sidaamu daga budunni gaance tirate horoonsidhannoti mitte gobbate ha’nura egenno no.
Iseno, “Affini” yinanni budeeti. Kuni budu amanyooti hiikkonne coyeno sumuu yaa hoogatenni kalaqantanno gaance baala “Affini” yaatenni keerunni gumulo afidhanno gede assinanni hayyooti. Techohu budu gafinkera Sidaamu daga gaancenna gibbo tirate horoonsidhannoha “Affini” budi amanyoote lainohunni shiqinshoommo.
Sidaamu daga haammatu biifadu budi noo bulduuda dagaati. Konni haammatu budi giddo mittu ‘’Affini” yinanni budu amanyooti noose. Kuni budu amanyooti gaancenna gibbo heedhuro “Affini” yine qarra tirate jawa kaa`lo afi`rinoho. Qara qara ikkitinota gaancete kaimanna hajubba badatenni araaru amuraate Sidaamu daga budu seeri garinni harissanno. “Affini” yaa mayaate? “Affini” yaa gaance tirate harinsho giddo hedo baalunkura songote noo beeqqaanora iillishate hayyooti. Baalunku macciishshitini? Yaatenni hedo iillinshanni doogooti.
Tini ha’nura egenno yannichu dagoomira heelliichote. Kuri giddo budunni gaance tirate amanyooti qara baycho afi`rino. Kunino, budu seerri garinni kaima assine daga sumuu yitinokki hajo aana araaranna sumimme kalaqatenna abbate gumulsitanno songo gaance tirate amanyooteti. Tini ha’nura egenno ikkitino daafira yannite yoote minna yooaanchimma amanyootinni baxxitanno.
Sidaamu daga konne amanyoote dirrate giddo agarte latisse keeshshiishshinoha umise hornya ikkanna; budunni gaance tirranni amanyooteeti. Konni giddo gaance tirate harinsho, “Affini” yine gaance tirate amanyootinni hedo baalanta songote beeqqaanora iillishate hayyooti; wolehono saysate, ilamatenninna ayiddunni bayra ikkinoha woy isinni sufe woroonni noohurano afino aatenna macciishshitini yaate kaa`lanno.
‘’Affini’’, hajo la`annonsa hallanyooti woy bissa songote giddo hasaawate woy gumulo aate harinsho aana beeqqaano ikkitanno gede kaayyo uytanno doogooti. Hedo halashshine maccishshiishate woy iillishate; qoleno, billaallitino hedo gamba assate yanna afi`rateno kaa`lanno hasaawu hayyooti yaa dandiinanni.
‘’Affini’’, afitto woy macciishshitini yine shiqishate, qoleno shiqqino hedo woy qaxxaro ikkitara dandiitanno. Wole, lubbo shiinohano ikkara dandaanno; tini hedo noowa gamba yee noo mannira buuxisatenna huwachishate hedo abbino manchi hasaaphinoha guma coye harunsitanni noo songote miilla adhite shiqqino hedo qeelate kaa`litannota yekkeerote hedo gamba assateeti.
Hattono, hedo irkissanno songote miilla shiqqino hajo garunni harunsitaranna irkissanno hedo insano burqisa dandiitanno gede kaajjishateno doogo fantanno. Kunino, goofimarchu gumulora doogo fantanno caakko leellishatenna tenne hedo irkissino songote miillano sumuu assate illachiishinoho. Giwannohu heerirono, “Hanni konne anewa qo`li” yee wole hedo heedhusiro baxxitino hedo noosiro shiqishate “Affini” amanyooti kaayyo aanno.
Sidaamu budinni daga hasaabbanno woyte, “Affini” yitukkinni mereeroho die`anno. Wole widoonni, mittichu gawajjo iillitinosi manchi, wole qaafo adhara albaanni qooxeessisira noo mannira woy jajjabbu geerrira “Affinni” yee afisiisate budu gadachanno. Affino shiqishikkinni giwe sae qaafo adhiro jajjabbu albaanni qorichinshanni.
Konne mancho loosino loosinni qooxeessaho noo daga ledo worannossikki daafira, uynannisi qorichi ayirrinnoho. Uynanni qorichi giddo, iddiretenni, suuqqo (uqquwetenni), hattono wole dagoomu millimillora noosi beeqqonna biilloonye hooganno gede; hirannokki gedenna hidhannkkita assanno; oososi mine assidhannokki gedenna labbaahuranno seenne haa’rannokki gede assinanni.
‘’Affini’’ amanyooti halaale hasatenna fushshate ledo addintanni xaadannoho. Halaale bande, buunxe qoleno suffino qaafo widira ha`rate ‘’Affini’’ yaa qara coyeeti. Kunino ikkannohu, hajote aana egenno noohu hiikku manchino hedo aanno gede hala`lado kaayyo kalaqannohuraati.
Uullatenni, dannunni, wolu minaama widoonni, lubbo hunate, diirunni, manni halaale haqaqqalatenni qaxxaro shiqinshoonni hajubba yoote minira haa`ne ha`nara albaanni Sidaamu budinni ‘’Affini’’ amanyootinni yoo woy farco uynanni. Dagoomu giddo gaance tirate kaayyo jawate.
‘’Affini’’ amanyootinni mittunna lamu manni mereero gumulo diuynanni. Shoolenna onte hakkiinni saino manni ledo hasaambe toribine gumulo uynanni. Affininni, gudumaaleho, Ficheete ayyaana lainohunnino yooaanchimmate looso loonsanni. Wole dagoomu hajubbano gudumaaleho harinsanni.
Jawa gaancenna hajo ikkituro affini amanyootinni tirate hajo gudumaale haa`ne ha`nanni. Kayinni, shiimmaadda coyee baala gudumaale haa`ne ha`nikkinni gaance kalaqantu baychono tira dandiinanni. Baycho doorrikkinni araarsitanno geerrinna bissa rahotenni iillite hajo tirte sumimme kalaqqanno. Konni amanyootinni, geerru caalu hunda ofolte “Halaale” fushshate looso loossanno.
Sidaamu daga geerri coyidhanno gede ikkiro “Affini” coye coommishanno makaati’ yite xawissanno. Affini hoogiro coy cancame ba’’anno. Oosote coye ikkanno yinanni. Songote mereero nafa sumimme hooggeenna qarru kalaqamiro nafa affini iillinshe coye wirro qiissa dandiinanni.
Sidaamu dagara “Affini” budu hornyasiiti. Daga dirrate owaante afidhanni keeshshitino budu Dana ikkanna; dagoomu deerra hattono wole ikkitonna baycho didoorranni. Hallaanyootu woy gaamote mereero gaance kalaqanturo, gawajjo iillitino manchi mulesi noo mannira, “Affini” yee gawajjo iillitinosi Dana ku`lanni qaxxadhanno. Affini yiniro gaance qiiddanno. Gawajjaminohanna gawajjo iillishinoha bande halaale fushshine tiranni.
Sidaamu daga budi garinni, lubbo shiinohano ikko, gosate mereero gaance kalaqanturo “Affini” amanyootinni halaale fushshine araarsini gedensaanni goofimarchoho saada gorrinanni. Wole shiimammaadda gaance woxunninna wolirichinni qorichishiinshe gundanni. Araara giwannohura ayiddu seera woranno; dagoomu beeqqonninna millimonni gobbaanni ikkanno.
Konni budu amanyootinni daga gaance tiratenni, daga yoote minnara hadhanni woxensanna yannansa guxxitannokki gede assitanni jawa qeechansa fultanni no. Tenne yannarano yoote minna haammata gaancenna coye tirtanno gede wirro gaance kalaqantu qaera sokkanni afantanno. Kuni amanyooti yoote minnarano looso shotisinoho.
Konnira, kuni “Affini” amuraatinna wolootuno dagoomu aana adhamooshshe afi`rino gedee budi, dagoomu mereero kalaqantanno gaancera gumulo aate jawa qeecha afi`rino. Tenne yannara gobbate deerrinni nooha sumumme hoogate qarra tirate gobbano togoo hornya horoonsi`ra hasiisannose. Ikkinohura, “Affini” gobbate keerunna hobbaatu daanno gede qeechasi fula dandaanno.
Bakkalcho Ella 8, 2015 M.D
