Abbebech Maatewoos
Bakiteeryunni daganno “infekshiine” ikkite Kalqete deerrinni lophitanni noo gobbubba roorinni Saara barahi woroonni afantanno daga aana lowo rakko iillishanno xibbaati.
Xissote Reqecci Assitannori Maati?
Tini xisso umikkihunni Ameerikaho hoteelete loossanno mancho (Mary Mallon (September 23, 1869 – November 11, 1938), amaddinoha ikkanna, ise loossino sagale itino manni xissamasinni kainohunni, assinoonni buuxonni “Salmoneella” yinanni bacteerinni daase buunxoonni.
Tenne Xagge garinni tayifoode taraabbannohu ishinino wayinnina sagaletenni ikkasi hegersineemmo.
Tayfoodete xisso aye woyte leeltanno qooxeessubbara loosa woy hara.
Xisso Leellishanno Malaate
Tenne xissonni amadamino manni woroonni noo malaatta leellishanno:-
• Biso iibbabbanna hunkiisha
• Umu damuume
• Godowa gobbara qolanna xissiisa
• Bisu mikitanna maala xissiisa
• Gobbara qola woy godowu moolle
• Qiida naqe huxisa
• Sagalete hasatto ajanna bisu shonte
• Sae sae tushiisha
• Buusiisanna wolqa huna
• Hattono fayimmate owaante keeshituro dammanna lubbama w.k.l
Assinanni Buuxo
Tayifoode afate mundeete buuxo fayyimmate ogeeyye labratooretenni bada dandiitanno
Wodanche, wo’munni wo’ma tayifoode afate aliidi malaattanna eote kulummo bakiteeri mundeete giddo afama, goofimarchu buuxooti.
Tini buuxo roore yannara lophitanni noo gobbara diafantanno, afanturo nafa baadiyete ikkikkinni quchummate heedhanno fayyimmate minnaraati.
Xagisi`nanni Gara
Fayyimmate ogeeyyewiinni afi’nanni kiniine woy lowo geeshsha xisso ayirrituro marfetenni xissote furgao uyitanno garinni owaante afira dandiinanni.
Tayfoode garunni xaginsiro shotu garinni huranno xissooti. Qarunni xaginsanni woyte lame lamala geeshsha keeshshanno “antibayotiik” xagga adhanna fayyimmate ogeeyye hajajjanno garinni horonsi’ra hasiissanno. Togo assa hoongiro xisso wirro higgara dandiitanno.
Xissote ledo amadisiisante daggino qarrubba heedhuro ledote buuxo hasiissara dandiitanno. Lawishshaho helleete madira xaadduro darre gowate xagishshi hasiisara dandaanno.
Gargadhinanni Gara
• Sagale loonsanni woytenna saga`late albaanni anga saamununninna waayinni hayiishshira.
• Wayinna sagale co`imma agarino garinni loonse saga`la.
• Waaho dandiiniro xagicho worre aga.
• Garunni ra`notanna iibbitino sagale saga`la.
• Laalonna ataakiltubba garunni hayishshini gedensaanni saga`la.
• Xisso amadduro fayyimmate minira ollonke hara hasiisanno.
Owaante Afira Hoongiro Daanno Qarra
• Helleete madira
• Surrete kisamanna
• Xagisira hoongiro lubbama w.k.l
Xaano wodanche, onte anga (5%) ikkanno mannira amaddamihunni diru geeshsha giddosinni tae ba”a hooganno. Wirrono xissanno. Kunino salmoneellu dombophiichote giddo ofolle wirro xisso abbannohuraati.
Hegerse, tini xisso co’itte buuxo woy “blood culture” yinanni buuxo nookkihura, “waydaali buuxo (widal)” yinanniha loonse kiniine adha hoogatenni roortanno.
Bakkalcho Ammajje 30, 2015 M.D Hamuse
