Gobbanke Itophiyu qamade wole gobbanni irkotennino ikko hidhatenni saino su’mi dinose gidu laalchi widoonni. Bunu laalcho soyaatenni kayinni “Miinju heellicho Buna,Buna; Eote Buenke Buna Buna yine faarsinanni gobbaati. Kayinnilla gidu widoonni techora iillite gide gobbara sokkanno yitanno ajuuja woffiimate. Techo kayinni dhagge soorrantino. Soorrote wolqa biilloonye amaddu yannanni hananfe xiinxallinoonninna qinaabbino doogonni gobba noo poletiku, miinjunna dagoomittete qarrubbanni gatisate dandiissannore hala’lado loossa loossino; loossannino afantanno. Konninni afi’nanni hee’noonni gumi luphiima, gobbate gede hananfoommoti soorrote doogo hexxo uytannota ikkase leellishannoho.
Baxxinohunni soorro babbaxxitino gobba giddonna gobbayidi wolquwa kalaqqanno xiiwonni shafantanni noo yannara gobbate miinji noo qarrinni gatisse haaro fooliishshowa reekkamanno gede leellishshanni noo murci’raanchimmanna kawiinni afi’nanni gumi gobba gatisate harinsho giddo jawa dhuka ikkanni dayno. Baxxinohunni konni alba hananfoonniri gobboomu jajjabba pirojektuwa/ Abbay kofatto/ labbinori xaaddinonsa mitiimma xiinxallatenni ikkado baajeette gaamme, kaajjado harunso assatenni pirojektuwa jeefante gobbate miinji aana agaramannose qeecha fula dandiitanno gede loonsanni gumano la’nanni hee’noonni. Mitootu mulqamate danonni fulte haaro tantanonna sokkonni gobbanna daga owaattanno akati aana afantanno gede assino.
Soorrote umose uyitino mootimmano dagate xawoho e’ino qaale gumulatenni; qaalehonna dagate noose ayirrinye garunni leellishshino. Luphiima mootimmate harunsonni gumulantanni noori jajjabba pirojektuwa gobba nooseta kalaqamu jiro latisatenni ledote gobboomu miinju dhuka kalaqate assinanni sharro, mittono ikko wole widoonni gobba jireenyunniwa reekkisate mootimmatenni assinanni sharrora lawishsha assine adhinannireeti. Konni gobbaanni gobba Qamadete laalchinni umose dandiite, laalcho gobbara soyaatenni gobbaydi soorro afidhanno gede luphiima illacha uyte loossanni keeshshitino. Konninnino gummaamma ikkatenni tenne lamala giddo gobba gobbara soya dandiitino. Kuni halaali gobbate hananfoonni soorro lowo mitiimma giddoonnino ikkiro borreessiissanni noo gumi noo mitiimma aleenni buuwate dhuki bowiranni daynota leellishannoha ikkino.
Soorrote wolqa dagate qaale e’ino hajubba aana jawaantetenni loossanni afantannota; tini sharro xaaddanno mitiimma aleenni assine xawoho fulle coyi’ra dandiinanni gede, gobboomu dhaggete borrorano haaro dhagge ayidde assitanni dagginota illetenni leellishshinote. Gobboomu hexxo guma gansiisate mittu lawishshi gede assine adha dandiinannite. IFEDR xaphoomu ministirchi dokter Abiy Ahimedihu tenne hajo lainohunni dagoomittete qoolisi aana ; Qamade gobbara soya hanafa lainohunni saysino sokkanni, ‘’Ninke ajuuja noonkere, ajuujanke coyi’neemmore, coyi’noommore hashshanna barra loonseemmore, loonsoommore qolle jeefinse leellinsheemmore ikkankera xawishshaho’’ yinohuno konniraati. Qaalisira baalunkuri aleenni naqaashe ikkara dandaannore loonsoonnihu/ la’nannihu looso callaho.
Tini mootimma gobboomu sharro kawiinni luphi yiino deerrinni gumulanteenna la’’ate wo’manti daganke, mitte mittente gobboomu hembeelote assootira badheenni nooha maaxamino illacha/ soorro hexxo nookkita assanna gufisa ikkase garunni huwante illese soorrote illachi aaninni kayissukkinni soorrote wolqa ledo murci’raanchimmatenni dirama hasiissanno. Konninino umisenni sa’ne dagganno ilama woyyaabbino gobba ragidhanno gede assa dandiitanno.
Gobbanke Itophiyu lophote doogo aana afantannota buuxisate hunda Qamadete laalcho gobbara soya hanafa mitte naqaasheeti. Qamade gobbara soya gobbaydi woxu soorro afi’rate,gobbate ayirrinyenna dhagge leellishate, hattono albankeenni noota jireenyu widira assinanni harinsho buuxisate luphiima qeecha godo’litanno.
Loosidhe galtino dagara hawado hawuurshu,arro gide gamba assi’nanni yannara kiirranni seesi qalo faarso gede jawaantetennakakkayishu malaateeti. Xaphi assine la’niro Qamade Gobbara Soyaate Hanafo Miinju Baqqeenyi Faashooti; Konnira mootimma hanaffino latishu looso ollohisanna loosidhe galtinori jawaata hasiissanno.
Bakkalcho Ammajje 9, 2015 M.D
