Mulunna shumate boombe madi’ra mulunni shumate ufuuffa geeshsha noo kifile gawajjitanno xissooti. Mada roore anga illete leellanno malaate leellishshurono mitu mitu manni aana horontanni malaate leellisha hooggara dandiitanno.
shumate ufuuffa madi’ra qarunni meento baxxinohunni iillino seenni aana kalaqantannoha ikkanna mite mite yannara labballunna qaaqquullu aanano kalaqantanno hedeweelcho heedhannota kullanni. Kiirotenni roore anga meentu aana kalaqantannoha ikkirono labballu aanano kalaqantanno woyte kayinni xisso meentunni roore kaajjitannotaati xagisaano kultannohu.
Qullaawu Phaawuloosi Hospitaalera giddoyidi xisso xaginaati goli baxxinohu mulu xagisaanchi dokter Biiniyam Girmihu xawisanni; kalaqamunni meentunnihu shumate amanyooti labballunni aleenni madi’rate reqeccaawinoho yaanno. Ledoteno batinse waa aga hooga, siimu xaadooshshi ledo amadaminohunni hee’rannohu co’imma agadhate akati, hattono shumate boombenna ufuuffate aana assi’nanniri wolootu xaginaatubba kaima ikkitanno coyubba mereerinni kullannireeti.
Roore anga shumate boombe madi’ra kalaqantanno woyite mudukku woriido ga’ma, mule mulenni shuma daa, shumaa’nanni yannara injoo hooga, giirate macciishshamme, shumate dani soorrame mundee lawanna baxxino foole afi’rino du’namaanchi leellanno.
Mulu madi’ra malaatta midaadu bisu kifile woy ( mulu aana) xissote macciishshamme, iibbabba, looqqi assa, tushshiisha, sagalete hasatto hooga ikkansanna mitu mitu manni aana malaatu hoogara dandaannota qummi assino. Shotanna kaajjado madi’ra kaima assinoha ikkado xaginaate gobba giddo uyinannita dokter Biiniyaami coyi’rino.
Shota ikkitino mada roore anga egemminanni xagganni 3 nni 7 barrubba giddo hurtannotanna kaajjado mada kayinni seeda yannara gonxe marfetenni xagisirate geeshsha iillinannita ikkase huwachishanno.Mada yannatenni xagisi’ra hoongiro mite mite yannara xagichunni hurtannokki deerra iillitannotanna konninnino darre xagisirate geeshshanna mule soorrirate geeshsha iillishshara dandiitannota huwachishinno.
Mada mulunni fulte nigu giddora e’uro kayinni xaginaatu mitiinsaranna reyote geeshsha iillishara dandaannota qummi assino.Konnira hiikku manchino diru dirunkunni mulu buuxo assi’rirono baxxinohunni mundeete xiiwo, sukkaarenna woloottu xisso noonsa mannooti kayinni 6 agani badooshshinni mulu fayyimma buuxo assidhanno gede amaallanni yaanno dokter Biiniyaami.
Bakkalcho Ammajje 2, 2015 M.D Hamuse
