Addis Ababa:- Hawaasi Quchumi diru dirunkunni hammata xawoho ayirrinsanni ayyaana danchu balchoominni adhe ayirrisanni keeshshino. Tenne ayyaanna giddo tayxe ayirrinsoonniti Itophiyu Daganna Dagoomu barrinna Qullaawu Gabirieeli ayyaanna mitte mitiimmanna bidhato nookkiha ayirrinse sa’noonni.
Xaano Arfaasu aganira ayirrinsanniha Mootichinke Yesuusi Kiristoosi Cuuaammete ayyaana seesallichanna biifino garinni balaxote qixxaawo assine iibbino garinni ayirrinsoonnita Hawaasi Quchumi Gashshooti Woga, Turizimenna Ispoortete Biddishshi egensiisino.
Biddishshu Sooreette Dukko Dargiitu Caale Itophiyu Pireesete Uurrinsha Bakkalcho Gaazeexira xawissino garinni; Cuuammete ayyaani gobboomu deerrinni xawoho dagatenni ledo mittimma ayirrinsanni ayyaanna giddo mittoho. Ikkinohura, balaxote qixxaawonni hananfe danchu garinni ayirrinsoonni yitino.
Kuni ayyaani baalunkuha ikkasinni Hawaasi Quchumi teessaanonna daga baala konne ayyaana baxillunninna mittimmatenni biifino garinni ayirrissinota hattono wosinna adhite koyissinota xawissino.
Cuuaammete ayyaani xawoho ayirrinsanni ayyaanaati; Dagano mittimmate ayirrissanno ayyaana ikkasinni; balaxote looso, Taabootu mare galannowano ikko doogga biifisatenna co`icha assate looso Hawaasi Quchumu teessaano albaannino egennantinotenna jawaata daga ikkitino daafira halamme loonsoonnitano Dukko Dargitu buuxissino.
Dukko Dargitu xawishshi garinni; “Quchumu seesallichonna biifinoha hattono investimentete injiinoha ikkanna, xaano Cuuammete ayyaana ayirrisara konni quchumira bobbakkino daga hagiirrunni ayirrissanno gede hoteellanna dagoomu qinaawino garinni qixxaawo assiteenna ayirrinsoonni” yitino.
Quchumu giddo babbaxitino daganna dagoomu hattono amma`note haruunsaano yaano musiliime wongeelu amma`no harunsaanonna wolootuno heedhanno quchuma ikkanna; Ortodokiste ammanaano ledo ikkite Cuuammete ayyaana biifino garinni balaxote qixxaawonni hanafe danchu garinni ayirrisamanno gede assitinota kultino.
Cuuammete ayyaani xawoho ayyaana ikkasinni haammatu amma`note harunsanonna wolootuno dagge ayirrisaannohura, quchumu widira haammata turistooti bobbakkino.
Tayxeha Cuuammete ayyaana Amaaru qoqqowira Xaanu Garbi aana ayirrinsinte gede, ninkeno Quchumu deerrinni konne ayyaana Hawaasi Garbi aana ayirrisamanno gede assinoonni yitino; Biddishshu sooreette.
Cuuammte ayyaana Hawaasi Garibi aana ayirrisamasi turizimete widoonni jawu qeechi noosita xawssinoti Dukko Dargitu; haammatu gobbate giddorinna baara widi turistooti quchumu widira bobbakkinota xawissino.
Hawaasi quchumi turizimete millimillo albihunni woyyaabbanni dagginota xawissnoti Dukko Dargiitu; roorenkanni konni cuuammete ayyannirano bashshonni roortino turistooti dagge konne ayyaana ayirrissinnota kultino. “Dawooe bushshu” budinkenna wosinna adhineemmo gari turizimete bobbanke baqqi yaate luphiima qeecha adhannoha ikkinotano xawisse;keerunna ga’labbo noo quchuma ikkasino doorammeemmore assinonkeri giddo kullannireeti yitino
Koroonu fayyaninna olu korkaatinni qiiddinoti turizimete millimillonna afi`nanni eo tenne yannara woyyaabbanni nootano kulatenni.
Ayyaanuno mitte mitiima nookkiha ayirrisame jeefisamanno gedenna dayno wosini wirro qaensara keerunni higanno gede assate dagate, quchumu gashshootinna wolootu ledo ikkine buusamme loonsoonnita kulte; konnira qeechansa fultinori baalanko galatase shiqishshino.
Abrahaam Saamueel
Bakkalcho Kiiro 9 Arfaasa 11, 2015 M.D
