Abbebech Maatewoos
Addis Ababa:- Olunni gawajjantinorinna caabbichunniti safote latishshuwa diigamansa korkaatinni caabbicho afidhukkinni keeshshitino quchumma aantanno lame lamala giddo owaantete horaameeyye ikkitannota Itophiyu caabbichu owaante egensiissu.
Itophiyu caabbichu owaante aliyye distiriikitera qaru loosu gumulsiisaanchi kalaa Bizuworq Demisse Itophiyu pireesete uurrinshara coyi`rino garinni; aliyye gobbate qooxeessubbara olu korkaatinni babbaxxitino qoqqowubbara caabbichu safote latishshuwa diigantino. Baxxinohunni Amaaraho, Affaaretenna Tigirayete qoqqowubbara afantanno quchummara caabbichu owaante taxxi yite keeshshitino.
Owaante wirro qolate babbaxxitino loossa gumullanni keeshshinoonniha ikkanna; xaa yannara Amaaraho, Affaaretenna Tigirayete qoqqowubbara olu korkaatinni aliyye gobbate qooxeessubbara kalaqantino kiphonni luphiima gawajjo iillitinonsa quchummara caabbichu owaante aantanno lame lamala giddo wo`munni wo`ma hanafisiisate illachiinshe loonsanni hee`noonni.
Kalaa Bizuworqi xawishshi garinni; Itophiyu caabbichu owaante xawinsoonni qoqqowubbara zoonetenna woradu deerrinni kipho kalaqantino qooxeessubbara afantanno 59 qara qara quchummara kalaqaminoha caabbichu owaante hoonge tirate mixidhe loossanni keeshshitino. Kuri quchummanni batinye caabbichu owaante afidhanno gede assa dandiinoonni. Gattinori qole lame lamala giddo afidhanno.
Lawishshaho, Tigirayete qoqqowira Shiraaro qooxeessira caabbiichunnihu safote latishshi iillinosi gawajjo korkaatinni gatamarshaho lame lamala adhanno. Ledoteno, mite mite Amaaru qoqqowira afantannore ikkansanni lawino garinni 15 barrubba giddo caabbichu owaante wirro afidhannota sooreessu kaysino.
Affaarete qoqqowira kurinna labbinori caabbichu owaante hoogginori gattino quchumma aantanno barrubba giddo caabbichu wolqa horaameeyye ikkitanno yiino.
Baxxinohunni, Woldiyunniti caabbichu wolqa bebbeenkanni mereershi mooramasinni mite mite Affaarete zoonnara afantannori Cifira, Senaanenna Awura labbino quchumma xaano caabbichu owaante afi’ra didandiitino. Ikkollana, Itophiyu caabbichu owaante konni qooxeessira mitte lamala giddo caabbichu owaante qolate babbaxxitino loossa gumultanni keeshshitinota sooreessu coyi`rino.
Lawino garinnino caabbichunnita safote latishshi diigamme iillishshino kipho harunse lame diro ale taxxi yee keeshshinohu Abbiaalla quchuminna qooxeessu caabbichu wolqa afi’rino.
Olu kalaqamino qooxeessubbara caabbichu wolqa wirro qolate mooru, safote latishshi diigamme, madaarantino fanjenna labbino qarrubba guficho ikkite keeshshitinore ikkansano huwachishino.
Bakkalcho Arfaasa 4, 2015 M.D
