Amsaalu Felleqe
Addis Ababa:- Aliyye gobbanke qooxeessira kae keeshshino oli keeru sumiimmenni gumulamasi gobbate miinji gawajjamannokki gede qeechisi luphiima ikkinota Hawaasi yuniversitera kalqoomu xaadooshshiXaadooshshinna Alumini hajubba Darikitoreete darikitere kalaa Yohaanan Yookamo coyi’ri.
Kalaa Yohaanan, baxxinohunni Itophiyu pireesete uurrinshara xawisino garinni; gobbankera Aliyye qooxeessira kaino oli sa’u lame dirrara gobbate miinjinna mannihimmate qoosso aana lowo gawajjo iillishe sainoho.
Olu giddo hee’nanni yannara olu korkaatinni gawajjamannorino ikko ola gargadhate assinanniri baalu miinju aana safaminoha ikkasinni baxxinohunni gobbaydi investimente aanano jawa gawajjo iillitino yiino.
Baxxinohunni, Itophiyu laalcho qaraxiweelonna batinyunni gobbaydi dikkora sokkanno kaayyo ‘’AGOA’’ horonsidhannokki gede tungoonni agawo gobbanke babbaxxino laalcho soyaatenni gobbaydi woxu soorro afidhannokki gede assatennino sae handaarunni bobbakkino investimente aana kalaqantino xiiwonni agarranni laalcho laashshitannokkinna qansootuno loosu kaayyo afidhannokki jawa korkaata ikkinota xawisino.
Gobba olu giddo heedheenna gobbaydinni xaaddotenni e’anno investimenteno ajjanni dagginota kulinohu kalaa Yohaanan; gaance keeru sumiimmenni gumulantu gedensaannino gobba xaa yannara noo akata kalqoomu dagoomira egensiisatenni qiidde keeshshitinota gobbaydi xaaddote investimente goshooshatenna tungoonni agawo kaysiisateno miinju dipilomaase loossa kaajjinshe loosa agarrannita coyi’rino.
Gobbate giddo kae keeshshino oli hiikko garinnino la’niro iillishino gawajjo mootimmate jiro calla ikkikkinni gobba diinunni diigantannokki gede gatisate yineenna mittu mittunku qansichi miinja kisinohanna gawajjinoha ikkasinni ayno qeelaancho ikkannokki daafira gobbate gede gawajjammoonniho yiino; kalaa Yohaanan.
Federaalete mootimmanna HWHT mereero Wodiidi Afrikira Piritooriyaho assinoonni sumiimme gobbate miinji gawajjamannokki gede noosi qeechisi luphiima ikkinotano xawisino.
Kae keeshshino oli Federaalete mootimmanna HWHT mereero keeru sumiimmenni gumulami gedensaanni kayinni gobba e’inohu qarrinni fushshatenna gawajjamino miinja wirro dhaawate mootimmano ikkito baalunku qansooti duuchu handaari latishsha kaajjishshe suffanno injo halashsha hasiissannota egensiisino.
Amadisiiseno, gobbaydi gobbuwanni ledo assinanni xaadooshshi Itophiyu ayirrinye kisannokkinna horose agarsiisanno garinni kaajjinshe harisa hasiissannotano coyi’rino.
Bakkalcho Arfaasa 4, 2015 M.D
