Addisu Adoola
Hawaasa:-Sidaamu Dagoomu Qoqqowi Mootimma Fayyimmate Biiro dagooma hanqaffino fayyimmate wowe loosi gumilshi keeno bare qoqqowu deerrinni sa’u Maakisanyo barra ha’rissino.
Bare qoqqowu deerrinni Shoole kilaasterera Hawaasa, Yirgaalame, Alatta Wondinna Daayye hajo la’annonsa bissa afantinowa harinsoonniha ikkanna; bareno qoqqowu loosu gumulsiisaano massaggino.
Worraddanna quchumma dagooma hanqaffino fayyimmate wowe daafira dagoomaho huwanyootu anje, owaantete widoonni leeltanno foonqenna labbannori loosu gumulshi aana hekko ikkitinonsa gede qummeessite; aante hajo la’annonsa bissa ledo halante loosatenni noo qarrubba tirte hasiisanno guma maareekkisiisate murcidhe loossannota xawissino.
Hawaasa harinsoonni Aliyye kilaasterenna Hawaasi Quchuma hanqaffino loosu gumulshi keenote bare massaginohu Jireenyu Paarte Sidaamu Qoqqowi sinu Borro Mini Soreessi Kalaa Abirahaam Maarshaallohu, dagooma hanqaffino fayyimmate wowe dagoomaho noose horo jawa ikkase deerrinni kaajjine loosa hasiissannota egensiisino. Konnirano woraddatenna quchummate loosu gumulsiisaanonna fayyimmate borro mini sooreeyye qeechansa garunni fultara agarrannita kaajjishe coy’rino.
Assinoonni keenonni woyyaawino guma mareekkisiissino waraddanna quchumma noontenni gede woffi yiino guma maareekkisiissino woraddanna quchumma noo gede coy’rinohu Kalaa Abirahaami, woffi yiino guma maareekkisiissino woraddanna quchumma harancho yanna giddo noo foonqe taashshatenni woyyaawino guma maareekkisiisatenni dagate horaammeessimma buuxisiissanno gede kaajjishe buuxisino.
Sidaamu Dagoomu Qoqqowi Mootimma Fayyimmate Biiro Lay/Sooreessi Kalaa Yohaannis Latamohu isi widoonni, 2015 M.D wiliilchunni 831,000 manni dagooma hanqaffino fayyimmate wowe miila ikkanno yine mixi’nenna xaa geeshsha wiliilchunni 193,000 manni callu miila ikkino. Kunino Mixo hasi’noonni deerrinni gumulantinokkita leellishannoho yiino.
Kalaa Yohaannis, konnira woraddatenna quchummate massagaano massagote bilchaante xefeenfe qara korkaata ikkitinota xawise; aantetenni noo xe’ne taashshi’ne hasiisanno guma abbate loonsannita coy’rino.
Jeefoteno Kalaa Yohaannis, Fayyimmate wowe daga xisso xaaddannonsa yannara woxe gooffe xagisi’ratenninna woxu hoongi korkaatinni fayyimmate mereersha mara hoogge dhibbunni gawajjamatenni gatisannohanna dirunni mitte higge baaxxitino shiimu birrinni(baadiyyete 450, quchumaho 650 birra) calla baaxxitino birri bikkinni ikkikkinni, dhibbinsa bikkinni umonsanna maatensa qooxeessaho afantanno fayyimmate uurrinshubbanni hanafe jajjabba fayyimmate uurrinshubba geeshsha xagisi’ra dandiissanno hayyo ikkitino daafira; dagooma hanqaffino fayyimmate wowe miilla ikkitanno gede sokkasi saysino.
Dirunniti Fayyimmate woowe miila ikkinanni yanna Arfaasa 30 geeshsha calla ikkanna Arfaasa 30 gedensaanni miila ikka dandiinannikkitano Kalaa Yohaannis, lede egensiisino.
Bakkalcho Arfaasa 4, 2015 M.D
