Qiddist Gezaheny
Addis Ababa:- Itophiyunna Chayinu seeda dirrara keeshshino jaaloomansanna halamate ayyaanansa bowirsi’ratenni Istiraateejikete xaadooshshensa woyyaawino deerra iillishate qixxaabbinore ikkansa egensiissu.
Lamente gobbuwa gobbaydi hajo ministirooti tenne lamala giddo Addis Abbaho xaadde hasaabbino.
IFDR Laynki Xaphoomu Ministirchinna Gobbaydi Hajo Ministirchi kalaa Demmeqe Mekonnini lamalate giddo Chayinu Gobbaydi Hajo Ministirchi Chin Gangi ledo hasaawino. Lamenti gobbuwa seeda dirrara keeshshitino halammenna jaaloomansa konni aleenni kaajjishatenni loosu widira soorrite loossannota ministirootu uyitino gutu xawishshinni egensiissino.
IFDR Laynki Xaphoomu ministirchinna Gobbayidi hajo ministirchi kalaa Demmeqe Mekonnini ministirchu ledo assino hasaawinni; kalqoomu, Ahigurete, qachunna gobboomu yannate hajubba aana tittirotenni gummaamo hasaawa assansa xawishshisinni kayisino. Kunino Itophiyu
Chayinu ledo noose gutu horo aana safaminoha lamooshshu xaadooshshe kaajjishate kaa’lannota xawisino.
Chayinunna Itophiyu seeda dirrara keeshshinohu kaajjadu xaadooshshi noonsa gobbaati yiinohu kalaa Demmeqe; sa’u dirra giddo kuni kaajjadu xaadooshshi aana safamino xaadooshshi noonsata qummi assino. Lamooshshu xaadoooshshi konni aleenni jawaatinoha ikkanno doogo tittirotenni la’noommo yee; lamente gobbuwa mereero Istiraateejikete halamaanchimma aana malaatissinota egensiisino.
Chaynunnihu Ministirchu muli yannanni mootoo’minoha ikkasinni aantino yanna gummaame ikkitanno gede halchosi xawisino. Mootoo’mi lamalara Afrikaho assino towaanyonni Itophiya kaima assasinni galatasi shiqishino. Chayinu kalqoomu ba’re aana Itophiyu keeraanchimmaranna gashshootu mittimmara kaajjado uurrinsha amadatenni noosita sufo nootanna massagote aana safantino uurrinshano jawaachishino.
Kalaa Demmeqe, Piritoriyunnita keeru sumiimmenna gumulote akata lainohunni Chayinu Gobbaydi Hajo Ministirchi ledo hasaawasi qummi asse; Chayinu Itophiyu keerinna ga’labbora assanno kaa’lo dhaggeeffatino.
Chayinu Itophiyu ledo babbaxxitino miinjunna dagoomittete hajubba aana halame loosanni afamannoha ikkasinni tenne halammera assanno irko kaajjishe suffanno gede; Chayinu kubbaaniyuwa Investimentete handaarinni bobbakkanno gede woshshatto assino.
Chayinu Dagoomittete Ripaablike Gobbayidi Hajo Ministirchi Chin Gangi isi widoonni; sa’u seeda dirrara Chayinunniri Gobbaydi Hajo ministirooti Afrika towaatansa akati Chayinu Afriku ledo noosi xaadooshshe konni aleenni kaajjishate noosi murci’raanchimma leellishannoho yiino.
Chayinu Itophiyu ledo seeda dirra Dipiloomaasete halamme noosita xawisatenni; Itiyo-Chayinu danchu xaadooshshinna jaaloomu lamente gobbuwa mereero noota wo’munku handaari Istiraateejikete halama woyyaawino deerra iillishannota coyi’rino.
Aanteteno Itiyo-Chayinu wo’munku handaari xaadooshshe woyyaawino deerra iillishate halamme kaajjite suffannota coyi’rino.
Chayinu Itophiyu ledo noosi xaadooshshi soorramannokkihanna sufo noo halamme aana safaminoha ikkinota qummi assatenni; dhaggete xaadooshshe roorenkanni kaajjishate loosannota xawisino. Chayinu Itophiyu ledo noosi lamooshshu xaadooshshinni qooxeessunna kalqoomu bare aana halame loosasi kaajjishe sufanno yiino.
Chayinu mootimma kalqoomu deerrinni leellanno akatu soorrama garinni Itophiyu ledo nooha wo’munku handaari jaalooma kaajjishatenna sufisiisate murciraancho ikkase buuxisino.
Chayinu kubbaaniyuwa Itophiyaho babbaxxitino Investimentete doorshi aana beeqqitanno gede Chayinu mootimma assitanno irko kaajjishshe suffannota qummi assino. Piritooriyaaho assinoonni sumiimme hagiirsiissinosita xawisatenni kalqoomu daga tennera irko assitanno gede woshshatto assino.
Bakkalcho Arfaasa 4, 2015 M.D
