Amsaalu Felleqe
Yirgaalame:- Yirgaalamete quchumira tayxe dirinni 2,800 wedellira loosu kaayyo kalaqate mixi’ne loonsanni hee’noonnita quchumu gashshooti egensiisi.
Quchumu gashshooti kantiiwi kalaa Derrese Alemu Itophiyu Pireesete uurrinshara xawisino garinni; quchumaho tayxe 2015M.D loosu kaayyo kalanqanninsa yine bandoonni wedelli giddonni rosonsa digiretenna dipiloomunni guddinore ikkitanna; balaxo uynoonniri kayinni digiretenni guddino wedelliraati.
Yirgaalamete quchumira wedellaho loosu kaayyo kalaqate hala’lado injoo noota kulinohu kantiiwu; kunino, quchumu gibirinninni, manufaakcheringetenni, konistiraakishiinetenni, owaantetenna woloottano loosu kaayyo kalaqo handaarranni rosonsa digirete deerrinni gudde dagginore hala’ladunni hanqafino garinni kaayyo kalanqanni hee’noonnita egensiisino.
Loosu kaayyo kalaqa calla ikkikkinni loosidhannowa, laashshitannonna hirtanno baseno injeessatenni xaa yannara maamarunni tantanante loosu giddora e’ino wedelli lawishsha ikkannore loosa dandiitanno kaayyo kalanqoonnitano coyi’rino.
Amandoonnihu 2015M.D sa’u onte aganna giddono 800 ali wedellira loosu kaayyo kalanqoonni yiinohu kalaa Derrese; xaa geeshsha iillinoonni gumulshi ikkado ikkinokkihura quchumaho afantannori qinaabbino gibirinnu industirete paarkenna industirete zoone ledo qinaawatenni mixote garinni wedellaho loosu kaayyo kalaqate illachinshe loonsanni hee’noonnita kaysino.
Wedellu konni albaanni rosonsa gudde higgu gedensaanni mootimmate loosu minnara calla qaxaramate hasattonna laooshshe agurtanni loosu kaayyo kalanqanninsa gede hala’ladunni xa’mate deerrira iillitonota qummeessinohu kantiiwu; quchumu gashshooti wedellaho hasiisanno garinni bejete gaameenna loosidhannonna hirtanno baseno injeessinanni hee’noonnita xawisino.
Loosu kaayyo kalanqanninsari rosonsa digiretenni guddinore calla ikkitukkinni dipiloomunni gudde higgino wedellirano ikkinota quchumu gashshooti kantiiwi lede coyi’rino.
Bakkalcho Arfaasa 4, 2015 M.D
