Abbebech Maatewoos
Addis Ababa:- Itophiyaho gummaammo gobbate gatamaarshi looso gumulate mootimmatenna fullahaanote mereero kaajjino xaadooshshi hasiisannota xawinsi.
Kotebe rosu yuniverisitera “Gobbate gatamaarshira fullahaanote qeechi” yaanno massagote hedonni tenne lamala giddo hasaawu bare qixxeessinoonni. Addis Ababu quchumi gashshootira layinki kantiiwi ba`lattonni demokiraasete amanyooti gatamaarshi mereershira qineessaanchu kalaa Mellese Alemu xawisino garinni; gobbate gatamaarshi amanyooti mootimmatenni sa”e baalunku qansichiha baxxinohunnino fullahaanonnita luphi yino qeecha xa`manno hajooti.
Kalaa Mellese xawisino garinni; fullahaano bobbakkino handaarranni gobbate gatamaarshira horo uytanno buuxote gumma gumulatenni; amaalete hedubba shiqishatenni gobbansa roore owaata noonsa.
Baxxinohunnino egennonsa horonsiratenni gobbansa miinji suwinoha ikkanno gede, polotiku amanyootubba dimokiraasaawe ikkitino doogonni suffanno gede hattono qansootu hobbaatinna gobbate mittimma ayirrisantanno gede kaajjite loossara hasiisanno yino.
Gobbate gatamaarshi harinsho danchu garinni gumultino haammata gobbuwa seyonsara fullahaanote qeechi luphiimaho yinohu kalaa Mellese; ninkehuno gobbate gatamaarshi loosi qinaawino fullahaanote qeecha xa`manno yeeno coyi`rino.
Ikkinohurano fullahaano mootimmate ledo xaade loosa roore rosiisira hasiisanno; Kotebe yuniverisitera qixxeessinoonniti hasaawu bareno fullahaano gobbansara noonsa irko lossate kaa`litanno yino. Bareno mootimmanna fullahaano mittu wole mishanno doogonni fulte mittimmatenni loossanno doogo kaajjishannoho yee huwachishino.
Kalaa Mellese xawishshinni; gobbate gatamaarshi hajo aana haammata qarrubba noonke. Kuri qarrubba xawise leellishatenna tirote hedubba loosu widira soorrate qole amaalammete barubba hasiissannoreeti.
Kotebe rosu yuniverisite pirezidaantichi dokitere Birhaanemesqel Xenna isi widoonni coyi`rino garinni; fullahaano gobbansa hajubba aana qaruudde beeqqaano ikkitanno doogo kalaqate aye woyteno wo`naala noonsa.
Sa`u yannara fullahaano qaccete daa“ataano ikkinoommo yaanno abbooshshe kayissanno. Mootimmano ise widoonni fullahaano dikaa`litinoe yitannotenni mimmitinsawa qubbicho kayisate qarri noota qummeessitino.
Dokiter Birhaanemesqel xawisino garinni; qarrubba heedhara dandiitanno ikkollana hasaawunni tirronsa yaanno rosichi hasiisanno. Ikkinohurano muli yanna kawa assinanninte gede baala xaade hasaawatenni qarrubba tira hasiisanno.
Mootimma shiqqe hasaawissanno woyte fullahaano qole dandiineemmo kaa`lo baraarsa, buuxubbankenna egennonke gobbate gatamaarshira hasiissanno horo uytannota ikkitanno gede wo`naala hasiissannonke yino.
Pirezidaantichu egensiisino garinni; mootimma fullahaanote ledo shinqe loons yitanno woyte mitte mittenta hajo paartete ledo xaadisantenni roore gobbate horora hossanno hajubba aana ha`lamatenni loosa hasiissanno.
Bakkalcho Sadaasa 27, 2015 M.D Hamuse
