Qiddist Gezaheny
Albiidinke qiddaame barra ayirrinsanni Yesuusi mootichu ilamishshi ayyaani ledo amadaminohunni qoqqowoho laalchu anjenna waagu lexxo kalaqantannokki gede addi addi injoo kalanqe loonsanni hee’noonnita Sidaamu qoqqowi dikkote latishshi biiro egensiissino. Ayyaanu ledo amadaminohunni qoqqowohonna baxxinohunni Hawaasi quchumi giddo addi addi faabrikunna gibrinnu laalcho shiqinshanni hee’noonnita Biiro xawissino.
Itophiyu pireesete uurrinsha Bakkalcho gaazeexi ledo hasaawa assinohu qoqqowu dikkote latishshi biiro sooreessi kalaa Ashshaagre Jemberehu coyi’ranni; ayyaanaho hasiisanno gibrinnu laalcho lainohunni konni alba mittimmate loosi maamarra ledo qinaambe ayyaanaho balaxotenni qixxaambanni keeshshinoonnihura mittimmate loosi maamarra laalchu noowiinni abbite dagate iillishshanni afantannota egensiisino. Xaa yannarano Hawaasi quchuma lede eela woraddatenna quchumu gashshootta geeshsha geexaanote maamarra widoonni laalchu hala’ladunni daganniwa shiqe afamanno; konninnino laalchu shiqisho anje nookkita kalaa Ashshaagre Bakkalcho gaazeexira xawisino.
Konninni ledote 1.3 Miliyoone Litire sagalete Zayite qoqqowo eessine tenne lamala giddo woraddatenna quchumu gashshoota geeshsha dirrinse base basente afantanno geexaanote maamarra widoonni dagate iillinshanni hee’noonnitano kulino.
Laalchu qoqqowo einohu mootimma kalaqqino injoonniiti yinohu sooreessu; Sukkaarete ledo amadaminohunni sa’u Shoole agannara gobbate gede Sukkaarete ijaarra looso uurrisse keeshshansanni Sukkaarete shiqisho anje kalaqante keeshshitinota qaagiisse; konni aganinni laashsha hanaffannohura qoqqowinke qeechinni iillitanno yee hedeemmo; laalchu qoqqowo daanno woyiteno geexaanote maamarra widoonni baalante dagara iillitannoha ikkanno yino.
Ayyaana harunse faabrikunna gibrinnu laalchi geexaanote maamarranna Baazaarete widoonni lamu garinni shiqannota qummi assinohu biirote sooreessi; laalchu konni garinni shiqasi dikkote aana waagu lexxo kalaqantannokki gede assatenni ledote shiqishote anjeno heedhannokki gede assino yino.
Konni gobbaanni seeriweelo waaga leddannorinna sagalete laalchi giddo fayyimma gawajjanno coye karsite hirtanno daddalaano qorqorate looso qoqqowunni kayinse woraddate geeshsha addi addi bissa ledo qinaambe loonsanni hee’noonni yee; konnirano seeru allaalshi, adawu, polisetenna ninke biironni fultinota qorqorshu komite uurrinse mittimmatenni loonsanni hee’noonnita coyi’rino.
Jeefoteno kalaa Ashshaagre sikkasinni; geexaano hidhitanno laalcho islanchimmasinna co’immasi buuxxe hidhitanno gede huwachishinno. Daddalaanono daddalu amanyootensa co’ichanna daga gawajjannokki garinni loossanno gede sokkasi sayisino.
Bakkalcho Sadaasa 27, 2015 M.D Hamuse
