- 960 miliyoone meddi yaanno woxe Tigraayete qoqqowira sonkoonni
Abbebech Maatewoos
Addis Ababa:- Itophiyu danote Bidhatto massagaano komishiine Federaalete mootimmanna HWHT mereero assinoonniha keeru sumuumme kaimu gede adhatenni gaancetenni gawajjantino qooxeessubba wirro gatamaaratenni mannihimmate kaa`lo shiqishate loonsanni hee`noonnita egensiisi.
Gaancetenni gawajjantino qooxeessubba wirro gatamaaratenna dagoomittete haaroonshi komishiine uurrinsoonnitano xawinsoonni. Itophiyu danote bidhatto massagaano komishiine komishiinerichi ambaasaadder Shiferrawu Tekilemaariyaam (Dr) tenne lamala giddo uyno xawishshinni egensiisino garinni; keeru sumuumme harunse mannihimmate kaa`lo shiqishatenna gawajjantino qooxeessubba wirro uurrisate loonsanni hee`noonni.
Konninnino xaa geeshsha 169 kume 905 metriik toon mannihimmate kaa`lo Tigraayete, Amaarunna Affaarete qoqqowubba sonkoonni. Umi doyichonni 141 kume 671 metriik toon ikkanno gide qoqqowubbate sonkoonni yinohu komishiinerichu; konni giddonni 88 kume 179 metriik toon ikkannohu qole Affaarete qoqqowira sonkoonniho. Konninnino umi doyichonni iilla noosiha mannihimmate kaa`lo wo`munni wo`ma iillisha dandiinoonni yino.
Sa`u lamalanni hanafe layinki doyichoha mannihimmate kaa`lo iillishate looso hananfoonnita xawise; xaa geeshsha Tigraayete qoqqowira 25 metriik toon, Amaaru qoqqowo 2 kume metrii toon ale hattono Affaarete qoqqowira 1 kume metriik toon ale mannihimmate kaa`lo sonkoonni. Kunino layinki doyichonni iillanno gede hendanniha mannihimmate kaa`lo xibbuunni 20% diwannoho yino.
Reqeccaabbino dagoomu kifillara hossannota 3 kume 882 dhaabbanno sagale mootimmatenninna ha`lamaano bissa widoonni hodhisiinsoonnita komishiinerichu lede xawisino.
Konninni ledotenni ha`lamaano bissa widoonni Meqelete widira 750 miliyoone 736 kume 105 birre, Shirete 208 miliyoone 962 kume 860 birre xaphooma 956 miliyoone 698 kume 965 woxe Tigraayete sonkoonni. Ledoteno 879 kume liitire nedaajeno Tigraayete qoqqowira hodhanno gede assinoonnita xawisino.
Komishiine Tigraayete qoqqowira 5.2 miliyoone, Amaaru qoqqowira 2.4 miliyoone hattono Affaarete qoqqowira 715 kume 132 barru hurbaati kaa`lo hasidhanno qansooti noota coyi`re; wirro uurrisate loossa wo`mu garinni gumulate dagoomittete haaroonshi komishiine uurrinse balaxote qixxaawote loossa jeeffanni nootano egensiisino.
Mannihimmate kaa`lo ayyaretenninna baaru hodhishshinni iillitanni noota xawinsoonniha ikkanna; baarunni Affaarete Abiaalla widoonni, Gonderete Humera shire widoonninna Kombolcha qobbote widoonni hodhisiinsanni hee`noonni. Ayyaretenni qole Meqelenna Shire erpoote widoonni barru hurbaati kaa`lo iillitanni noota buuxisiisino.
Bakkalcho Sadaasa 27, 2015 M.D Hamuse
