Qaaqquulle kaajjado xissonni gargarate kittiwaate shotanna keeraanchimmase agarantino hayyo ikkasenni maate yannatenni qaaqquullensa kattawisiissanno gede amaallanni.
kittiwaate mitto taraawanno dhibba gargarate balanxe uynanni xagicho ikkanna; mannu dhibba gargadhate dhuka bowirsatenna gargarooshshu kemikaale kalaqqanno gede assatenni dhibbu daasira albaanni gargartanno.
Kittiwaate diru giddo haammata daga dhibbunni amadantannokki gede gargartannoha ikkanna; dhibbunni amadamino manchi qooxeessaho hee’riro nafa mannimmate giddora lixxe e’e dhibba kalaqqannokki gede assitanno.
Kittiwaate gargartanno qaaqquullu dhibbuwa mereerinni:-
Dipteeriya:- Kuni dhibbi du’ma du’namaancho kokkete giddo kuusatenninna shombo fugatenni hattono foo’la hoolatenni amadannoha ikkanna xagisi’ra hoongiro reyote iillishanno dhibbaati.
Haxo wira:- Mannimmate mikita baxxinohunni kelleshshate qooxeeessira afantanno mikitta kaajjishatenni foo’la hoonganni gede assanno dhibbaati.
“Tikki-Tikki”:- Lowo geeshsha kaajjado ikkitino uurritannokki buusano, tushshiisha, foo’la hoogate geeshsha iillituro qaaqquullu aana “Tikki- Tikke” yinanni dhibbi hee’rara dandaanno.
Huffannanna boqichu:(Baqqaalla Darshiishanno)- Huffannanna boqichu vayiresetenni dagganno dhibbuwa ikkitanna bisu aana shifi yee fule hangaarsiisara dandaanno.
Goowu hundaanni guranna qiniiteenni iibbabbatenna xissote ledo amadaminohunni darshe heedhuro kayinni boqichu dhibbi (Darsheessanno) malaateeti.
Kuri dhibbuuwa duucha woyte lubbote waajjinannire ikka hooggurono qaaqquulle hattono shiimaadda ooso shetissannoreeti.
Qaaqquullu shombu miche:- Mittu qaaqqi baxxinohunni 5 diri woroonni ikkeennasi umu damuume, buusanonna foo’late qarrama heedhusiro shombu michedhibbinni amadaminoha ikkara dandaanno.
Konne dhibba gargadhate kaa’litanno kittiwaatubba anjenni adhiro kayinni kuri dhibbuuwanni gatanno.
Heppetayites:– Illete woyi mannimma baqqala ikkanna deeiishsha, tushshiisha, mikitate daafuranna godowu xisso qaaqquullu aana leeltanno Heppitayitesete dhibbi malaatta mereerinni qarunni kullannireeti.
Pooliyo:- Kuni dhibbi baxxinohunni sayikki kalqete gobbuwara lekkate kalaqami qarra abbitanno malaatta mereerinni ikkanna Kittiwaatetenni gargara dandiinanniha ikkasi XiqurAmbessu fayyimmate sayinse kolleejenni afi’noommo mashalaqqe kultanno.
Qiddist Gezaheny
Bakkalcho Sadaasa 20, 2015 M.D
