Addis Ababa:- Komishiinerootu gaamo Tigirayete qoqqowo maransa gobboomunnita amaalamme wo`ma assate hee`rannosi qeechi luphi yinoho yee; gobboomu amaalamme komishiine komishiinerchinna miidiyu sooreessi Yoonaas Adaayye (kaa`laanchu piroofeeserchi) coyi`ri.
Tigirayete qoqqowo martino 10 miilla noosi gobboomu amaalamme komishiinerooti gaamo mereerinni ikkinohu Yoonaas Adaayye (PhD); ‘’batinye hinge Tigirayete qoqqowo ha`neemmo yinanni keeshshinoommo; xa yanna fajjiteenna basete geeshsha maranke amaalete gumulora jawa dhuka ikkitanno’’ yiino.
Baalante Itophiyu qooxeessubbara noonte gede baala keere hasi’rate macciishshamme Tigirayete dagawano no. Gobboomu amaalamme komishiinerootira Tigirayete assinoonni wosinsi’rano hagiirsiissannotenna dagate danchumma leellishshinote yiino.
Tigirayete qoqqowo hodhankenni qixxaawote loossara kaa`litanno coyibba injeessineemmo gede kaa`lanno. Xaphooma kipho noo qooxeessubbaranna babbaxxitino gobbate kifillara gumullanni hee`noonniti gobboomu amaalamme qixxaawote loosi hexxo aanno garinni gumulamanni afamanno yiino.
Yoonaas Adaayye (PhD) xawishshi garinni; babbaxxitino qoqqowubbara assinanninte doorshanna amadisiisantino loossa Tigirayete qoqqowirano aantete gumulantanno. Konni loosira kaa`litannnonna amaale qineessate kaa`litannota sinu borro minna aantete fana hasiissanno.
Amaalenniti komishiine babbaxxitino qooxeessubbara borrote minna fanate mixi`noonninte gede Tigirayeteno borrote minna fanate amandoommo mixo gumulanno gede Tigirayete qoqqowira assinoonni hodhishshi lowontanni hasiisannoho. Baxxinohunni Tigirayete noota shoole mootimmate yunverisite borrote mini gede horonsi’rate amandoonni mixo seekkanno gede wo`naalsha assinanni yiino.
Yuniveristubba looso hanaffanno woyte fullahaanonnita, rosaanonnitanna rosu uurrinshuwaha dagooma, buuxote gumma horonsiratenni gobbannita ikkitino ha’nura egennonni amaalete harinsho aantete gumulate mixo amandoonni.
Tigirayete qoqqowira hodhanke korkaatinni gobboomu amaalamme widoonni gumaamma loossa loosantannota jawa hexxo noonke. Xa aantete gumullanni loossa daafira tittirshu mixo qixxeessinanni afammeemmo. Tittirshu hajubba lainohunni aantete mitte mittentanni hajo lainohunni dagate faajje assinannino yiino.
Itophiyaho noo 48 mootimmate yuniverisitenni shoole afantannohu Tigirayete qoqqowiraati yiinohu Yoonaas Adaye (PhD); qooxeessu budenna hee`naanni gara xaphooma akata shiqqe huwattanno mereerima uurrinshuwa ledo gutunni loosate hananfoonni wo`naalshi sufanno yee coyi`rino.
Kiphuwa heedheennano amaale harisa dandiinannita Kolombiyunni, Bermaanuwiinninna babbaxxitino gobbaydi gobbuwanni rosicho la`noommo. Kiphote gedensaannino amaalete harinshubba maa lawa noonsaro kalqoomu rosichi no. Konne rosicho adhinanni wolootta kipho noonsa qooxeessubbara iillate hasatto noonke yaatenni xawisino.
Tigirayete gumullanni hee`noonniti hexxo uytanno loossa wolootta qooxeessubbarano heedhanno amaalete loosira dancha hanafooti. Xaphooma kipho noo qooxeessubbara gumullanni loosi amaalennita harinsho gummaame assate safo tuganno akata kalaqannota ammannanni.
Abbebech Maatewoos
Bakkalcho Sadaasa 20, 2015 M.D
