Hawaasa:- Babbaxxitino eote buichonni afi’nanni jiro fulote bikka ajishatenni dagoomaho hasiisanno latishsha halashshinanni hee’noonnita Sidaamu dagoomu qoqqowi womaashshu biiro egensiissu.
Womaashshu biiro “Chaanaale 1na 2 pirogiraamubbanni afi’noonni jironni qoqqowoho loosantinota babbaxxitino pirojekitubba gumulshano hajo la’annonsa bissanni ledo tenne lamalara Hawaasi quchumira keenate bare harinsoonni.
Qoqqowu womaashshu biiro sooreessi tenne yannara coyi’ranni; babbaxxitino bu’anni afi’nanni jiro yanna yannantenni lexxitanni daggino.
Chaanaal 1na 2 yaamantanno pirogiraamubbanni qoqqowoho sai 2013M.D 1.4 biliyoone; 2014M.D kayinni 1.8 biliyoone birra hattono 2015M.D 1.847 biliyoone birra jiro afi’noonniha ikkanna handaarunni dagganno jiro giddonnino xibbuunni 90% ikkannoha kaapitaale pirojekitubba loosira hattono 10% looso harisate hosiinsannita coyi’rino.
Qoqqowoho womaashshu gashshoote yannitte assate soorrote loossa hananfoonnita coyi’rinohu sooreessu; konnirano, afi’nanni jiro halaalunni, xawadimmanna xambe noo garinni massaganna loosu aana hosiisate ragaanni biiro jawa yawo adhite loossanni afantannota qummeessino.
Mootimmate woxe milli yitannonna milli yitannokki jiro gashshate, qorqorate, jirote buicho hasatenna afi’noonni jiro loosoho mallaada nookkiha hasi’noonni illachira hosiisatenni dagate kasseenya lossate illachinshe loonsanni hee’noonnitano hattonni.
Biirote deerrinni ogeeyyeno ikko sooreeyyete widoonni hedote soorro abbatenna ikkado assate hendeenna sa’u dirrara haammatu mannira qajeelsha uynoonni yee; hedote soorro abba calla ikkikkinni amanyootunna loossate hayyono yannitte assine diriirsate ragaanni illacha tunge loonsanni hee’noonnita huwachishino.
Babbaxxitino bu’anni afi’nanni jirono fulote bikka ajishatenninna hafanfarrenna mooru nookkiha; hattono dagooma hasiisanno latishshira hosiisatenni dagoomunniha latishshu xa’mora dawaro qollanni ha’ra doorshu nookki hajo ikkaseno sooreessu coyi’rino.
Womaashsha gashshate harinshonni buqqeete soorrono abbineenna hattono loossate hayyo woyyeessine diriirsineennano woyyaabbannokki harinsho heedhuro kayinni mootimmate jiro hanfanfartannokki gede assate seeru aliidimmano agarsiisate loossa gumullannita coyi’rino.
Chaanaale 1na 2 yaamantanno pirogiraamubbanni afi’noonni jironni qoqqowoho babbaxxitino qooxeessuwara loosantino pirojekitubba keenni yannarano baadiyyetenna quchummate loonsoonni pirojekitubba loossa mixote garinni taaltinota ikka hooga; loossate baantoonni woxi luphi yinoha ikkanna; loossa kayinni deerrinninna isilanchimmanni gumulama hooga; dagate xalala anganni waa hattono doogga iillishate ragaanni loossa duumbara gattano harinsho hee’ra; loossa hanafisiisate dandiisiissanno ga’afo yannantenni fushsha hooganna labbinori xe’nete gede kayinsoonnireeti.
Keenotenni la’noonni xe’ne taashshatennino albillicho loonsanni pirojekitubba islanchimma noo garinninna handaarunni gaammoonni bejete yinoonni illachira calla hosiisate harinsho gumula hasiissannotano kayinsoonni.
Qoqqowoho chaanaale 1na 2 yaamantanno pirogiraamubbanni dirritino jironna daggino jironni loonsoonni loossa; Qoqqowu Gibirinnu biiro widoonni ‘’CALM’’ pirogiraamenni qoqqowu giddo babbaxxitino basera loosantino loossaha dancha rosicho; Qoqqowu wayilla shiilote biiro widoonni ‘’CRGE’’ pirogiraamenni Lokka Abbaayyu woradira way handaarinni loosantino loossa dancha rosicho shiqinshoonni.
Amadisiisantino odoonni, womaashshu biiro IFDR Woxu ministere IPF pirogiraame bejetete irkonni mootimmate fulo gashshootenna qorqorsha lainohunni qoqqowoho baalante woraddanna quchummate gashshootubba womaashshu borro minna loosaaasinera sa’u Sanyote barrinni hanaffe ga’a geeshsha Irgaalamete quchumira dhuku dhaabbanyooti qajeelsha uytanni afantanno.
Amsaalu Felleqe
Bakkalcho Sadaasa 20, 2015 M.D
