Addis Ababa:- Tigirayete qoqqowira xaa yannara noo akati xintu latishshuwa qarrubba harancho yanna giddo tirate dandiisiisannoho yaanni Dagate riqiwamaano amaale mini qaru songaafichi Taaggese Caafo xawisi.
Keeru sumiimme harunse Meqele hadhinori Federaalete mootimma gaamo massagaanchinna dagate riqiwamaano amaale mini songaafichi Taaggese Caafo; keeru sumiimme ledo amadisiisaminohunni mitte mittenti Federaalete uurrinshuwa maa loosa noonsaro Xaphoomu ministirchi leellinowa hasaabbinota kule; qoqqowoho xaa yannara noo akati xintu latishshuwa qarrubba harancho yanna giddo tira dandiinannita buuxisannoho yiino.
Wodiidi Afrikirano ikko Keeniyaho Nayroobi Federaalete mootimmanna HWHT mereero keeru sumiimme harinsihunni hanafe haammata Federaale mootimma uurrinshuwa xintu latishshuwa halashshate illachishshe loosate wo’naltanni keeshshiturono xe’ne leeltinota qummeessinohu gaamote massagaanchi; xaa yannara mixotenni irkisamino garinni Meqele quchuma lede Tigirayete baalante qooxeessuwara xintu latishshuwa wirro gatamaratenna owaante hanafisiisate balaxote qixxaawo assine loosu giddora e’noonnita kulino.
HWHT murrichi Debretsiyon Gebremikaeeli (PhD) isi widoonni; gaamo Meqele daansa qoqqowoho woyyaabbino loossa loonsanni gede dandiisiisannotanna keeru sumiimme gumulshira woyaabbino hedo heedhanno gede assannota coyi’rino.
Gaamo Meqele daansa alba albaanni xaande hasaambeemmo gede kaayyo uytinote yee; gaamo qoqqowoho leellansa mannihimmate irko xe’ne nookkiha Tigiraye e’anno gede assannotano lede coyi’rino.
Mannihimmate kaa’lo xa e’anni noo gari danchaho yinanni deerrira noota qummeessatenni; mannihimmate kaa’lo shiqo aana federaalete mootimmanna kalqoomu uurrinshuwa dancha millimillo hanaffino yaannino xawisino. Ikkollana xaggate shiqo qarri xaano noota buuxisino.
Qoqqowoho noo quchumma Caabbichu owaante horaameeyye ikkansa buuxisinohu murrichu; gatamarate hajo ikkinniina wo’munni wo’ma Tigirayete qoqqowi gobboomu caabbichi finco (greed) ledo xaadino
Itiyo Telekoomeno gargarooshshu olanto afantanno Tigirayete qoqqowi qooxeessira owaante aa hanaffinota xawise;waaaxantino gaamo roorimankanni xaphoomu ministirichi abiy ahimed keeru sumiimme gumulsiisate leellishino kaajjillira galata shiqishshino.
Yaareed Geetaachew
Bakkalcho Sadaasa 20, 2015 M.D
