- 3.3 Miliyoone Birra ale Ikkanno Jajjino Baino
Hawaasa:-. Tayxe 2015M.D bocu dirira calla Tiraafikete danonni 82 mannu lubbo ba’inota Sidaamu Dagoomi Qoqqowi Mootimma Doogotenna Hodhishshu Biiro egensiissino.
Biirote Sooreessi Kalaa Birhaanu Latamohu Itophiyu Pireesete Uurrinsha Bakkalcho Gaazeexi ledo assino keeshshonni xawisino garinni; tayxe bocu dirira xaa hee`noommo Sadaasu agani geeshsha calla haammata tiraafikete dano kalaqantino.
Xaphoomunni konne diro ontu aganira kalaqantino dano batinyi 132 ikkanna; 82 manni lubbo ba`ino; 42 jawanna 49 shota gawajjo no hattonni. Danote korkaatinni woxunni bikkiniro 3.3 miliyoone ali birra ikkanno jajji gawajjaminotano Kalaa Birhaanu buuxisino.
Sidaamu Qoqqowi deerrinni tayxe kalaqantino dano niri danonni ledo heewinsiro 26 lubbo lexxite ba’ino.
Tiraafiikete dano duucha yannara kalaqantannohu roorenkanni Hawaasinni Dilla massitanno culuuta doogo aana ikkinota kulinohu Sooreessu; baxxinohunni Alatta Cuukkote qooxeessiranna quchumaho mannu lubbamanna jajju ba”a haammattino. Mittu barrinni calla Cuukote quchumira 12 manni dano iillitinowa basete reyinotano Biirote Sooreessi qaagiissino.
Haammata tiraafikete dano mannunna jajju aana kalaqantannohu lamu goommi xexxerrisinni ikkinota kulinohu Kalaa Birhaanu; mitticho lamu goommi motorera hogowate fajjinoonni bikki aleenni hogowatenni dano iillishshannota buuxisino.
Tiraafiikete dano nirinni tayxe woyyaawa hasiissannase roorenkanni lexxitanni hadhanni nootanna mannunna jajju aana gawajjo haammattinota kule; danote korkaati duucha ikkinota huwachishino.
Oofaano ikkadimmate anje, kaphu oofaate fajjo, oofaanote akatu ba`ne yaano aggenna caate corqitanni oofa; doogo bobboqama; wodhotenni aleenni sa`ne wiinamunni oofa; doogote ranke ajishanno malaati hooganna wolootta korkaatuwa danote kaima assine adhinoonnitano buuxisiino.
Biirote Sooreessi Kalaa Birhaanu; “Baadiyyete widoonni hodhishshu owaante uytannoti lamu goommi xexxerrisi taargiweello loossannoha ikkansa xaa geeshsha tiraafiikete dano lexxitanni hadhanno gede assatenni sa`e qorqorateno guficho ikkitino” yee; dano iillishshanno oofaano Seeru widoonnino uynanni qorichi ajano wole korkaata ikkitinota ledino.
Tini tiraafiikete dano lexxitanni hadhannokki gede ittisate, biiro qoqqowu pooliste komishiine ledo halamatenni qoqqowu giddo xaa geeshsha 17 woraddara rosicho aatenna huwanyoote kalaqate looso loossanni noota kulino.
Amma`notenna rosu minnara hattono dikkote mannu haammatinowa gatikkinni rosichonna huwanyo kalaqate loosono lende lonsanni hee`noonnita xawisno.
Qoqqowu giddo tiraafikete dano lexxitanni ha`ra hattono mannu lubbamanna jajju ba”a dagate giddo bidhatto kalaqqinohura, oofaano dano abbitanno gawajjo garunni huwatte seerunna wodhote garinni ooffanno gede; dagano hattonni hajo la`annonsa bissa ledo halante tiraafiikete dano korkaati widoonni dagganno gawajjo aana wolootaho huwanyo kalaqanna qoropho adha hasiissanonsa yee sooreessu sokkasi saysino.
Abrahaam Saamueel
Bakkalcho Sadaasa 20, 2015 M.D
