Addis Ababa:- Xaphoomu Ministerichi Dr Abiy Ahimed Tigirayete Qoqqowira loosantanni noo owaante shiqishate loosi rahotenni loosamanno gede addi addi uurrinsha loosu harisaanora biddissa saaysinota Xaphoomu Ministerchi Gobboomu Hobbatete Amalaanchi Ministerichinna Keeru Qara Komite miili Ambassadder Reediwaani Huseenihu xawisi.
Ambassadder Reediwaani Huseenihu tiwiterte qoolisira saaysinonte gede, albi ooyimbarra Dagate Riqiwamaano Amaale Mini Songaafichi Taaggese Caafonni massagantinoti Federaalete Mootumma Liuukaane Gaamo Meqele assotino hasaawa lainohunni Xaphoomu Ministerichi Dr Abiy Ahimedihura hasaawinota xawisino.
Xaphoomu Ministerchi xawishsha macciishshi gedensaanni biddishsha uynota xawise, biddishshu kaiminni Itophiyu Horophilu Doogo Maqale assitanno buuwa bero barrinni hanaffinotanna Itiyo-telekoome muli yanna giddo owaante hanafanno barra faajje assitannota egensiisino.
Naayiroobi keeru sumimme kaiminni jajjabba olu uduunne tirsiisatenna techo Hamusete barrinni kaayise IFDR Gargarooshshu Olanto Meqele Quchumira baayriidi seeri qoodasi fula hanafanno yine agarrannita Ambaassader Reediwaani Huseenihu buuxisino.
Federaalete Mootimma Piriitooriyu keeru sumimme gedensaanni sayikkiti wole anga mereeroho e`ukkinni umi yannara HWHT Massagaano ledo Meqele albunni xaadde albi ooyimbarra hasaabbinoti qaangannite.
Dagate riqiwamaano Amaale mini songaaafichi Kalaa Taaggese Caafohunni massagantino gaamo Tigirayete quchuma Meqele iillitu woyite iibbadu koyishshinni haa’noonninsa harinshono TPLF na Federaalete mootimma mereero kalaqantino sumiimme loosunni leelltinota ikkaseno xawinsoonni
Federaalete Mootimma jajjabba massagaano Gaamo, Meqele ha`ra keeru sumimme loosu aana hosseeenna hegeraamu keeri daanno yite hexxo assidhinota Meqele Quchumi teessaano xawissinotino qaangannite.
Abrahaam Saamueel
Bakkalcho Sadaasa 20, 2015 M.D
