Qiddist Gezaheny
Tayixe arri gorsu loosinni 6.7 Hektaare baatto Arri gorsi qmadenna gati laalo latisate mixi’ne loonsanni hee’noonnita Hawaasi gaangaawi Woradi qaru gashshaanchi kalaa Tesfaye Doorihu egensiisino.
Qaru gashshaanchi Itophiyu Pireesete Uurrinsha ledo assino hasaawinni; woradaho tayixe gorsu looso lamu garinni loonsanniha ikkanna arri Qamade gorsu loosonna rosaminoha gorsu looso ikkinota xawisino.
Woradunnihu diilallote akati Gammoojje ikkasi harunsine qarunni gati muronna Qamade laashshinannita Bakkalcho Gaazeexi ledo assino hasaawinni xawisino. Tayixeha arri gorsi looso baxxannoha assannori mereerinni Badheessu gidi ba’’asinna heeshshote ooltonni dagate aana iillitanno gawajjo ajishate dikkote injoo kalaqatenni daga horonsidhanno gede assate daga hasaawinse rosaminoha gorsu looso hananfoonnita kule; arri Qamadera 3 kume 903 hektaare baatto latinsoonnita coyi’rino.
Woradunnihu diilallote akati moola ikkasi kayisinohu qaru gashshaanchi; wayi anje xaaddannokki gede balaxote qixxaawo assinoonnitanna; konnirano waa goshshooshshanno maashine lede Hawaasi garbi qooxeessira 2 kume ale ikkitannota shiimaadda waa kuunsanni balla umme daga hakkiichchinni horonsidhanno gede qixxeessinoonnita xawisino. Ledoteno 5 xibbe Meetire bale umme waa goshooshshanno paampuwa qixxeessinoonnita qummi assino.
Wixanna harishsha shiqishate widoonni gati muronni konni alba Qunqumadu Shaaninna Timaatimete sircho shiqishate aana waagu lexxa ledo amadaminohunni anje noota kayise; woradaho gibrinnu e’’o shiqishshanno gede uurrinsoonni uurrinshuwa garunni shiqishshanno gede injoo kalaqate loonsanni hee’noonnita kule; Qamadete sircho lainohunni kayinni qoqqowu mootimma ledo loonsoonniha ikkasinni sirchu anje nookkita kalaa Tesfaye uurrinshinkera xawisino.
Bakkalcho Sadaasa 13, 2015 M.D Hamuse
