Yaareed Geetaachew
Hawaasa:- Guuta baankete owaante uytannota 10 sinna babbaxxitino gobbate qooxeessuwara fanate qixxaabbinota Sidaamu Baanke egensiissu.
Baanke tenne xawissinohu sa’u muli barrubba giddo Hawaasi quchumira baankennita dayirekiterootu boorde xaphooma gambooshshe harissu yannaraati.
Konni albaanni Sidaamu Maykiro Faynaanse Uurrinsha’’ yineenna egennantinoti suuqotenna liqoote uurrinsha ‘’Sidaamu Baanke Akisiyoone Maamara’’ ikkatenni baankimmatenni tantanamate sai Maaju agani 2014M.D Itophiyu Biheeraawe baankenni fajjo afidhinoti qaangannite.
Sidaamu Baanke qaru loosu gumulsiisaanchi kalaa Taaddese Haxxiyya Itophiyu Pireesete Uurrinshara xawisino garinni; Baanke Maykiro fayinaansete uurrinsha deerrinni noo yannara woffi yitino eo noonsare dagoomu bissara jawa owaante uytanni keeshshitino.
Uurrinsha uytanno owaante tirfissannotanna dagoomahono luphiima horo uytannota ikksenni baankete widira lophite Biheerawe baankenni fajjo afidhinotano qaagiissino.
Xaa yannara 1 kume, 988 gutu akisiyoone noonsa miilla hanqaffinoti Sidaamu baanke; malaatinsoonni kaapitaale 1 biliyoone 447 miliyoone birra ikkinotanna konni giddonni 583 miliyoone birri ale ikkanno woxi baantoonni kaapitaale ikkasino kalaa Taaddese xawisino.
Baanke loossanno loossa mereerinni baadiyyetenna quchummate dagoomira baankete owaante halashsha ikkinota xawisinohu Baankennihu loosu gumulsiisaanchi; muli yanna giddono umikki doyichonni guuta baankete owaante uytannota 10 sinna babbaxxitino gobbate qooxeessuwara fanate qixxaabbinota egensiisino.
Sidaamu Maykiro Faynaanse Uuurrinsha konni albaanni xibbuu kuminni kiirranniri dagooomu bissa horaameeyye assitanni keeshshitinoha ikkanna baankete owaante hananfi kawano irshu loossanni, Hoteeletenna woloottano investimentete handaarranni bobbakkino dureeyye horaammeeyye ikkitinota coyi’rino.
Baanke investimentete loossara womaashshu buicho ikkate dhuki nooseta xawinsinohu kalaa Taaddese; uurrinshannihu baankete loossa garunni tantanamase baxxinohunni investimentete handaarranni bobbahate hasidhannorira hala’lado kaayyo kalaqannoha ikkasi qummeessino.
Uurrinsha Biheeraawe baanke wortinoha hooffaydi kaimu kaapitaale wonshate gutu akisiyoone hirtinoha ikkanna; malaatinsoonni akisiyoone baante gundanni gede assatenni baankenniti uurrinshu loossara ledote kalqoomu baankete loossa gumulate loossanni afantannotano loosu gumulsiisaanchi xawisino.
Sidaamu Baanke wolootta woxu kaapitaale dhuki noonsa Baankuwanni ledo heewisama dandiitanno gede malaatinsoonni akisiyoone woxi rahotenni baatama hasiissannotano kalaa Taaddese amadisiise sokkasi saysino.
Baankennihu dayrekiterootu boorde gambisaanchi kalaa Abrihaam Maarshaallo tenne yannara coyi’ranni; Sidaamu baanke Biheeraawe baankenni fajjo afidhu gedensaanni baankete handaarinni uynanni owaante aate balaxote qixxaawo assitanni keeshshitinota coyi’rino.
Kalaa Abrihaami xawishshi garinni; baanke sai bejetete dirinni 142.3 miliyoone birra diru giddo eo gamba assate mixidhe 177 miliyoone birra eo mixote aleenni gamba assa dandiitino. Kunino, sai dirinni ledo heewisiinsanni woyte xibbuunni 58% roorrimma leellishino yiino.
Wolu garinnino, baanke diru giddo 48 miliyoone birra tirfisate mixidhe 83 miliyoone birra tirfisatenni baankete dhaggenni woyyaawa guma maareekkisiissinota xawisino.
Baanke 165 miliyoone birra suuqote woxe gamba assatennino sai dirira xibbuunni 29% lopho leellishshinota kalaa Abrihaami lede xawisino. Akisiyoonete miillano gatino baatooshshe sasu agani giddo baatte guddanno gedeno boored shiqishshinoha ikkanna miillano wo’ma huuronni sumuu yitino.
Bakkalcho Sadaasa 13, 2015 M.D Hamuse
